![](https://i0.wp.com/www.thenepaltop.com/wp-content/uploads/2020/03/bharatpur_isolation_hospital.jpg?fit=1017%2C450&ssl=1)
चितवन : कोरोनाभाइरस संक्रमित व्यक्तिको उपचारका लागि निर्माण गरिएको कोरोना विशेष अस्थायी अस्पताल आज (शुक्रबार)देखि सञ्चालनमा आएको छ ।
भरतपुरको प्रदर्शनी स्थलमा ७२ घण्टामा निर्माण भएको कोरोना विशेष अस्थायी अस्पतालमा ५० बेडको क्षमतामा आज ओपीडी सेवा सञ्चालन गर्ने तयारी भएको भरतपुर महानगरपालिकाका प्रमुख रेणु दाहालले जानकारी दिए ।
‘७० बेडको अस्पताल निर्माण तयारी भएको छ । अहिले ओपीडी सेवा सञ्चालन हुनेछ । त्यसपछि आइसोलेसन व्यवस्था गरिनेछ । ओपीडी सञ्चालनपछि आईसीयू सेवा पनि सञ्चालन गर्ने तयारी तीव्र पारिएको छ ।’ प्रमुख दाहालले भने ।
आज १४ जना जनशक्ति अस्पतालमा खटिनेछन् । बिरामीको चाप र आवश्यकताअनुसार जनशक्ति र उपकरणहरू थपिँदै लैजाने कोरोना नियन्त्रण कार्यदलका प्रवक्ता डाक्टर भोजराज अधिकारीले बताए ।
कार्यदलको बैठकले शुक्रबारबाट चितवनमा सञ्चालन हुँदै आएका हाटबजार र केबुलकार पनि बन्द गर्ने निर्णय गरेको कार्यदलका सदस्य नारायण अधिकारीले जानकारी दिए ।