![](https://i0.wp.com/www.thenepaltop.com/wp-content/uploads/2020/03/sima-photo.jpg?fit=1024%2C576&ssl=1)
वीरगन्ज– पर्साको ग्रामिण भेगको सिमा नजिकै भारतीयलाई नेपाल प्रवेश गर्न नदिएपछि एक समूहले नेपाल प्रहरीमाथि नै हातपात गरेका छन् ।
खुल्ला सिमा नाका भएर प्रबेश गर्न खोज्ने चार पाँचजनाको समूहमा आएका भारतीयहरुले डियुटीमा खटेका प्रहरी चौकी प्रसौनी भाठ्ठाका प्रहरीमाथि हातपात गरेका हुन् ।
बिन्दवासिनी गाउँपालिका वडा नं. ५ प्रसौनी भाठ्ठा स्थित मधुवाको खेतबारीको खुल्ला सिमा भएर ती भारतीयहरु नेपाल प्रबेश गर्न खोजेका थिए ।
‘लकडाउन’ ले सहज रुपमा नेपाल प्रवेश गर्न नपाएपछि खुल्ला सिमानाको मौका उठाउँदै जबर्जस्ती नेपाल प्रबेश गरेका थिए । नेपालमा प्रवेश गरेको देखेपछि प्रहरीले रोक्न खोज्दा उल्टै हातपातमा उत्रेका थिए ।
हातपात गर्ने मध्ये एक जनालाई प्रहरीले पक्राउ गरीसकेको छ । अन्य फरार हुन सफल भएका छन । भारत बिहार पुर्वि चम्पारण कुकुहिया १३ निवासी बर्ष ३५ का अवधेश महतोलाई पक्राउ गरिएको इलाका प्रहरी कार्यालय पोखरियाका प्रहरी निरीक्षक चन्द्र कुमार सिंहले बताए ।
पक्राउ परेकालाई ईलाका प्रहरी कार्यालय पोखरियाको हिरासतमा राखी थप अनुसन्धान भइरहेको उनले बताए । हातपातमा संलग्न हुनेहरु बिहारमा मदिरा निषेध गरिएका कारण नेपालमा प्रवेश गरी मदिरा सेवन गरी आउँने जाने हुन् ।