काठमाडौं : स्वास्थ्यकर्मी कोरोना संक्रमित भएपछि सिनामंगलस्थित काठमाडौं मेडिकल कलेज (केएमसी) अस्पताल केहि दिनको लागि बन्द गरिएको छ ।
केएमसीमा कार्यरत एक चिकित्सक, एक जना नर्सका साथै अस्पतालमा उपचारका लागि आएकी एक जना सुत्केरी महिला तथा ओपीडीमा जाँच गराउन आएका एक अर्का व्यक्तिमा कोरोना देखिएपछि थप संक्रमण फैलिन नदिन नयाँ बिरामी नहेर्ने निर्णय अस्पतालले लिएको हो ।
बुधबार संक्रमण पुष्टि भएका स्वास्थ्यकर्मी दोलखादेखि आएका संक्रमितको उपचारमा संलग्न थिए ।
अहिले अस्पतालभित्र कसैलाई छिर्न दिइएको छैन । केएमसीकी प्राध्यापक तथा प्रवक्ता डा. चन्दा कार्कीका अनुसार ट्रेसिङमा फेला परेका अस्पतालका डेढ सय स्वास्थ्यकर्मीको हिजै स्वाब संकलन गरेर परीक्षणका लागि टेकुस्थित राष्ट्रिय जनस्वास्थ्य प्रगोगशाला पठाइसकिएको छ भने आज अझै केही स्वास्थ्यकर्मीको स्वाब पठाइने छ ।
प्रवक्ता डा.कार्कीले राम्रै पीपीई लगाएर बिरामी हेरेका स्वास्थ्यकर्मीलाई संक्रमण सरेको बताइन् ।
उनले भनिन्–‘यस्तो भएपछि अस्पतालका अन्य बिरामी र नजिकको समुदायमा समेत संक्रमण फैलिने सम्भावना र त्रास भयो । अनि हामी आफैले अस्पतालको सेवा बन्द गरेको हा, सरकारले सिल गरेको होइन ।’
उनका अनुसार शल्यक्रियाका लागि तयार राखिएका बिरामी लेभल–३ का अस्पतालमा रिफर गरिएको छ भने अस्पतालमा नै उपचाररत अन्य ६० जना बिरामीको स्वाब परीक्षणपश्चात रिपोर्ट नेगेटिभ आएपछि मात्रै बाहिर जान दिइनेछ । उपचार छाडेर घर जान चाहने बिरामीको विस्तृत ठेगाना टिपेर मात्रै पठाइनेछ ।
रिपोर्ट नेगेटिभ आएपछि स्वास्थ्यकर्मीलाई मात्रै काममा फर्काइने उनले बताइन् । यो अवस्थामा नयाँ बिरनमी छिर्न दिँदा संक्रमण सर्ने जोखिम बढेको जानकारी दिँदै उनले अस्पतालका सबै वार्डमा निर्मलीकरण शुरु गरिएको बताए ।
