काठमाडौँ : राष्ट्रपति विद्यादेवी भण्डारीले संयुक्त राष्ट्रसङ्घको आह्वानमा शान्ति स्थापना कार्यको लागि नेपाल सरकारको विश्व शान्ति प्रयासप्रतिको निष्ठा र प्रतिबद्धता बमोजिम नेपाली सेनाले दिएको योगदान उदाहरणीय रहेको बताएकी छन् ।
संयुक्त राष्ट्रसङ्घको आह्वानमा शान्ति स्थापनार्थ लेबनानमा तैनाथ हुन जाने रणशार्दुल गण (शा.से) ६०औँ डफ्फाको पाँचखालस्थित वीरेन्द्र शान्ति कार्य तालीम केन्द्रमा सञ्चालन भएको प्रि (डिप्लोयमेण्ट) तालीम समापनका अवसरमा राष्ट्रपति भण्डारीले पठाएको शुभकामना सन्देशमा सो कुरा उल्लेख छ ।
राष्ट्रपति भण्डारी नेपाली सेनाका परमाधिपति हुनुहुन्छ । सन्देशमा राष्ट्रपति भण्डारीले भनेकी छन्, ‘शान्ति सैनिकले कार्यक्षेत्रमा आफूलाई एक योग्य शान्ति सैनिकका रुपमा परिचित गराई पेशागत दक्षता र कुशलता, मानवअधिकारको उच्च सम्मान तथा मानवीय सहयोगको भावना राखी विश्व शान्तिप्रति नेपालको गहिरो प्रतिबद्धताको सन्देश संसारमा फैलाउन नेपाली सेना सफल हुनेमा पूर्ण विश्वास छ ।’
समापन समारोहमा राष्ट्रपतिले पठाएको शुभकामना सन्देश बलाधिकृत रथी हेमन्तराज कुँवरले पढेर सुनाएका थिए । समारोहमा बलाधिकृत कुँवरले तालीममा हासिल गरेको ज्ञान र सैनिक कौशललाई मिशन इलाकामा आफ्नो जिम्मेवारी बहन गर्न निर्देशन दिएका थिए ।
कार्यसम्पादनको क्रममा एक अर्काको धर्म, संस्कृति र परम्पराको सम्मान गर्न निर्देशन दिँदै उनले अन्तर्राष्ट्रिय क्षेत्रमा शान्ति स्थापाको मुख्य जिम्मेवारी उत्कृष्ट ढङ्गबाट सम्पादन हुने विश्वास व्यक्त गरे । समारोहमा मिशनमा तैनाथ हुने गणले विभिन्न अभ्यास तथा प्रदर्शनी गरेको थियो ।
रासस
