काठमाडौं : इङ्ल्याण्ड र वेल्समा जारी १२ औं संस्करणको एकदिवसीय विश्वकप क्रिकेटमा उपाधि दाबेदार भारतले अफगानिस्तानसामु २ सय २५ रनको सामान्य लक्ष्य प्रस्तुत गरेको छ।
साउथह्याम्टनमा टस जितेर पहिले ब्याटिङ गरेको भारतले पूरै ५० ओभर खेल्दै ८ विकेटको क्षतिमा २ सय २४ रन बनायो। भारतका लागि कप्तान बिराट कोहलीले सर्वाधिक ६७ रनको योगदान दिए।
३१ ओभरको तेस्रो बलमा मोहम्मद नाबीले रमात शाहबाट क्याच गराउनुअघि विराटले ६३ बलमा ५ चौका प्रहार गरे। केदार जाधव ६८ बलमा ३ चौका र १ छक्कासहित ५२ रनमा क्याच आउट भए।
त्यस्तै ओपनर के एल राहुलले ३०, विजय शंकरले २९ र महेन्द्रसिंह धोनीले २८ रन बनाए। भारतले ओपनर रोहित शर्मालाई १ रनमा गुमाएको थियो। हार्दिक पान्ड्या ७ रनमा क्याच आउट भए।
अफगानिस्तानका मोहमद नाबी र गुलाबदिन नाइबले समान २–२ विकेट लिए। त्यस्तै मुजिब उर रहमान, रहमत शाह, राशिद खान र अफताब आलमले समान १–१ विकेट हात पारे।