सिटीको सानदार जित, टोटनहम रोकियो



काठमाडौं। फरवार्ड गाब्रियल जेससको ह्याट्रिकसहित चार गोल प्रेरित म्यानचेस्टर सिटीले इंग्लिस प्रिमियर लिग फुटबलमा वाट्फोर्डविरुद्ध ५-१ अन्तरको जित निकालेको छ । घरेलु मैदान इतिहादमा सिटीलाई सानदार जित दिलाउन ब्राजिलका फरवार्ड जेससले एक्लै चार गोल गरे भने अर्को एक गोल रोड्रीको नाममा रह्यो।

वाटफोर्डका हसाने कामराले सान्त्वना गोल फर्काए । सुरुवातबाटै आक्रमण खेलमा ध्यान दिएको सिटीले पहिलो हाफमा तीन तथा दोस्रो हाफमा दुई गोल गरेको थियो । जितसँगै सिटी ३३ खेलबाट ८० अङ्क सहित शीर्ष स्थानमा रहेको छ। एक खेल कम खेलेको  लिभरपुल ४ अङ्कले पछि छ।

पराजित वाट्फोर्ड २२ अङ्क जोडेर रेलिगेसन जोनमा छ। लिगकै अन्य खेलमा टोटनहम ब्रेन्टफोर्डसँग गोलरहित बराबरीमा रोकियो। आर्सनलले म्यानचेस्टर युनाइटेडलाई ३-१ अन्तरले पराजित गर्‍यो। अर्को खेलमा न्युक्यासलले नर्विचलाई ३-० अन्तरले पराजित गर्दै लेस्टर सिटी र एस्टन भिल्लाले गोल रहित बराबर खेले।

प्रतिक्रिया दिनुहोस्