काठमाडौं । नेपाल राष्ट्र बैंकले मौद्रिक नीतिमा लिइएका उपायहरुको कायान्वयनको स्थिति तथा विद्यमान राष्ट्रिय एवम् अन्तर्राष्ट्रिय आर्थिक स्थिति र परिदृश्यलाई दृष्टिगत गरी मौद्रिक नीतिको कार्यदिशालाई यथावत राखिएको जनाएको छ।
शुक्रबार आर्थिक वर्ष २०७९/८० को अर्धवार्षिक समीक्षा गरेको केन्द्रीय बैंकले सजगतापूर्वक लिएको कसिलो नीतिगत कार्यदिशाका कारण शोधनान्तर स्थितिमा क्रमशः सुधार आउन गई २०७९ असोजदेखि बचतमा रहन थालेको, उपभोक्ता मूल्य वृद्धिदरमा पनि केही कमी आउन थालेकाले मौद्रिक नीतिलाई यथावत राखिएको जाएको छ।
तथापि, केही वस्तुहरुको आयातमा लगाइएको प्रतिबन्ध र प्रतीतपत्र खोल्दा राख्नुपर्ने नगद मार्जिनसम्वन्धी व्यवस्था पूर्ण रुपले हटाइएको सन्दर्भमा आयात पुनः बढ्न गई बाह्य क्षेत्रमा दबाब पर्न सक्ने सम्भावना भने अझै जीवितै रहेको बैंकले जनाएको छ।
औसत मुद्रास्फीति अझै पनि लक्ष्यभन्दा माथि रहेकोले चालु वर्षको मौद्रिक नीतिमा लिइएको कार्यदिशालाई यथावत राखिएको बैंकले जनाएको छ । यसको कार्यान्वयनबाट आन्तरिक तथा बाह्य क्षेत्र स्थायित्व सुदृढ भई आर्थिक गतिविधि सहज हुन सहयोग पुग्ने अपेक्षा रहेको छ।
