काठमाडौं । सरकारले जग्गाको कित्ताकाट खुला गर्ने भएको छ । प्रधानमन्त्री पुष्पकमल दाहाल प्रचण्डले भू-उपयोग नीति अनुसार जग्गा वर्गीकरण नगरी पुरानै स्थितिमा कित्ताकाट खुला गर्ने तयारी भइरहेको बताएका हुन् । बजारमा तरलता अभाव हुनुमा यसको पनि असर रहेको भन्दै कित्ताकाट खुला गर्न लागिएको बताइएको छ ।
प्रधानमन्त्री प्रचण्डले सोमबार पोखराबाट आएको उद्योगी व्यवसायीसँग सिंहदरबारमा भएको भेटमा , तरलताको समस्या भनेको जग्गामा गएर पैसा फसेको छ, कित्ताकाट रोकिएको छ बेचबिखन रोकिएको बताएका हुन् । उहाँले पूँजीको अभाव हुनुको एउटा कारण त्यो हो भन्ने कुराले अहिलेलाई जग्गाको वर्गीकरणवाला कुरोलाई थाती राखेर भए पनि पुरानै स्थितिमा लैजाने र कित्ताकाट र जग्गा बेचबिखनलाई सैद्धान्तिक सहमति क्याबिनेटबाट दिने, त्यसो गर्यो भने अहिलेको क्राइसिस म्यानेज गर्छ भनेर हुन सक्ने जति कोसिस गरेको बताउनु भएको छ ।
सरकारले यसै वर्ष ल्याएको भू-उपयोग नियमावलीका कारण स्थानीय तहले कृषि र गैर कृषियोग्य जग्गाको वर्गीकरण गर्नुपर्छ । यसरी जग्गाको वर्गीकरण गरेपछि मात्र कित्ताकाट हुन झन्झटिलो व्यवस्था त्यसमा रहेको थियो ।
प्रधानमन्त्री प्रचण्डले नेपाल अर्थ बजार पहिलेको भन्दा सुधारको अवस्थामा रहेको बताउँदै बैकको ब्याजदर एक अंकमा झार्नको लागी आफ्नो प्रयास रहने बताएका छन् ।
