काठमाडौँ । चीनमा यतिबेला कीर्तिमानी गर्मी बढिरहेको छ । जुन महिनामा उत्तरी चीनका धेरै सहरहरूमा गर्मीले सबै रेकर्ड तोडेको छ। लगातार बढ्दै गएको तापक्रमका कारण बिजुलीको खपत ह्वात्तै बढेको छ । जसका कारण यहाँ आपतकालीन अवस्था सिर्जना भएको छ । यस्तो कुनै पनि अवस्थाको सामना गर्न यहाँका प्रमुख अधिकारीहरूले आपतकालीन ड्रिल गरेका थिए । चीन अप्रिल महिनादेखि बढ्दै गएको तापक्रमले चिन्तित छ । त्यसयता चीनको तापक्रम सामान्यभन्दा बढी छ ।
चिनियाँ समाचार सञ्चारमाध्यम सीसीटीभीका अनुसार हेबेई प्रान्तको झाङ्जियाकोउ र चेङ्देमा जुन महिनामा गर्मीले सबै रेकर्ड तोडेको छ। राजधानी बेइजिङमा पनि लगातार तापक्रम बढिरहेको छ । बेइजिङले शनिबार जुन महिनाको सबैभन्दा तातो दिन रेकर्ड गरेको छ। यहाँ ३९.४डिग्री सेल्सियस तापक्रम रेकर्ड गरिएको थियो । शुक्रबार केन्द्रीय मौसम विज्ञान प्रशासनले बेइजिङको तापक्रम शनिबार ४० डिग्री पुगेको जनाएको छ ।
चीनमा बढ्दो गर्मीका कारण यहाँका पावर ग्रिड अपरेटरलाई उच्च सतर्कतामा राखिएको छ । दक्षिणका केही सहरहरूमा फर्महरू र मानिसहरूलाई कम बिजुली प्रयोग गर्न भनिएको छ। चीनको राष्ट्रिय ऊर्जा प्रशासनले बिहीबार राज्य ग्रिडको पूर्वी चीन नेटवर्कमा नक्कली आपतकालीन अभ्यास सञ्चालन गरेको छ । यो ड्रिल बिजुलीको मागमा भएको वृद्धिको बारेमा प्रारम्भिक चेतावनी र ऊर्जा व्यवस्थापन प्रणाली सिर्जना गर्ने बारे थियो। गत मे महिनामा सांघाईमा शताब्दीकै सबैभन्दा तातो दिन रेकर्ड गरिएको थियो।
