काठमाडौँ । टस जितेर ब्याटिङ रोजेको पाहुना टोलीले दिएको १७३ रनको लक्ष्य नेपालले १८ ओभर ५ बलमा पुरा गरेको छ । पहिला ब्याटिङ गरेको स्ट इन्डिजले निर्धारित २० ओभरमा ७ विकेटको क्षतिमा १७२ जोडेको थियो।
पाँच खेलको यस शृङ्खलाको पहिलो र अन्तिम खेलमा नेपाल विजयी भए पनि बाँकी तीन खेलमा पराजित भएको थियो। गत अप्रिल २७ बाट सुरु भएको शृङ्खलामा नेपाल ३-२ ले पछि पर्यो।
नेपालको जितमा अनिल साह र आसिफ शेखले अर्धशतकको योगदान गरे। १७३ रनको लक्ष्यसहित जवाफी ब्याटिङमा ओर्लिएको नेपालका सुरुवाती ब्याटर कुशल भुर्तेल दोस्रो ओभरमा नै आउट हुन पुगे।
जम्मा ९ बल खोलेका उनले ३ चौकाको मद्दतले १३ रन जोडे। ओबेड मकोइको बलमा हेडेन वाल्सले उनको क्याच लिए। त्यसपछि आएका अनिल साह र अर्का ओपनर आशिफ शेखले उत्कृष्ट साझेदारी गरे जुन जितका लागि निर्णायक बन्न पुग्यो।
कुल ३२ बलमा अर्ध शतक पुरा गरेका शेखले त्यसबेला सम्म ५ छक्का प्रहार गरिसकेका थिए। जम्मा ५१ रन जोडेका उनलाई मकोइले चौधौँ ओभरमा क्याच आउट गराएका थिए।
अनिल साहले सोहौँ ओभरमा छक्का प्रहार गर्दै आफ्नो अर्धशतक पुरा गरे। ४५ बल खेल्ने क्रममा ५८ रन बनाएका साहलाई मकोइले दयालमार्फत क्याच आउट गराएका थिए।
अनिल आउट भएपछि क्रिजमा आएका दिपेन्द्र सिंह ऐरी धेरै समय टिक्न सकेनन्। कुल ६ बल खेलेर ५ रन जोडेका ऐरी बाउन्ड्री प्रहार गर्ने प्रयासमा क्याच आउट भए।
वेस्ट इन्डिजलाई मध्यम स्कोरमा समेट्ने क्रममा नेपालका सागर ढकाल र सोमपाल कामीले ३-३ विकेट लिए। ढकालले दोस्रो ओभरको चौथो बलमा ११ रन जोडेका खदिम एलनलाई क्याच गराए। उनैले आठौँ ओभरमा वेस्ट इन्डिजका थप दुई विकेट लिएपछि पाहुना टोली दबाबमा पर्यो।
आठौँ ओभरको पहिलो बलमा जोनसन चार्ल्सको प्रहारलाई ढकाल आफैँले क्याच गरे। तेस्रो बलमा लामो प्रहार गर्ने क्रममा मार्क डेल क्याप्टेन रोहित पौडेलबाट क्याच भए। त्यसबेलासम्म वेस्ट इन्डिजले ६० रन जोडेको थियो।
क्याप्टेन रोस्टोन चेजले टोलीका लागि २४ बलमा ३३ रन जोडे। उनी १४औँ ओभरमा बलिङ गर्न आएका नेपालमा डेथ ओभर स्पेसलिस्ट अविनाश बोहराको बलमा सन्दीप जोराबाट क्याच भए।
क्याप्टेन रोस्टोन चेजसँग साझेदारी गरेका एलिक एथान्जले वेस्ट इन्डिजका लागि अविजित रहेर टोलीका लागि सर्वाधिक ४२ रन जोडे।
नेपालका तीव्र गतीका बलर सोमपाल कामीले टोलीका लागि अन्तिम तीन विकेट लिए। उनले १७औँ ओभरमा २३ रन बनाएका म्याथ्यू फोर्डलाई बाउन्ड्री नजिकै कुशल भुर्तेलबाट क्याच गराए। पुनः १९औँ ओभरको बलिङमा आएका कामीले दोस्रो बलमा फाबिअन एलेन र पाँचौँ बलमा गुडकेस मोटीको विकेट लिए।
सोमपालले सबैभन्दा कम रन खर्चिँदै चार ओभर बलिङ गर्दा तीन विकेट लिए। उनको ओभरमा वेस्ट इन्डिजको टोलीले १६ रन मात्रै जोड्यो।
