काठमाडौँ । राष्ट्रिय खेलकुद महासङ्घअन्तर्गत नेकोस राष्ट्रिय क्रिकेट सङ्घले सन्दीप लामिछानेलाई आईसीसी विश्वकप खेल्न जानबाट रोक्न अमेरिका जाने भिसा प्रक्रियाका लागि असहयोग भएको बताएको छ ।
सङ्घका केन्द्रीय संयोजक चेतनाथ आचार्यले विज्ञप्ति जारी गर्दै नेपाल क्रिकेट सङ्घ (क्यान)का अध्यक्षसहित पदाधिकारीले लामिछानेलाई अमेरिका जाने भिसा प्रक्रियामा असहयोग गरेको र बरु क्यान अध्यक्ष नै खेलाडी र स्टाफको कोटामा श्रीमतीलाई लिएर अमेरिका हिँडेको आरोप लगाएका छन् ।
‘सन्दीप लामिछानेलाई अमेरिका जाने प्रक्रियामा भिसा समस्या उत्पन्न भएको छ । लामिछानेको भिसा प्रक्रियामा नेपाली क्रिकेट सङ्घका अध्यक्ष लगायत केही पदाधिकारीहरूले पहल गरे जस्तो देखिने, तर कुनै ठोस तरिकाले प्रक्रिया नबढाएको देखिन्छ, त्यस कारण कतै जिम्मेवार व्यक्तिले नै सन्दीप लामिछाने माथि षड्यन्त्र गरेको त होइन रु
भन्ने आशङ्का उत्पन्न भएको देखिन्छ,’ आचार्यले जारी गरेको विज्ञप्तिमा भनिएको छ, ‘किन कसरी भन्दा सन्दीप लामिछानेको अमेरिका जाने प्रक्रिया केही दिन मात्र बाँकी हुँदा क्यानका जिम्मेवार व्यक्ति अध्यक्ष स्वयम् आफू, आफ्नो पारिवारिक व्यक्ति तथा निकट व्यक्तिलाई लिएर अमेरिका जाने क्रम देखिन्छ, उक्त अमेरिका जाने प्रक्रियाले आईसीसीले विश्वकपको लागि खेलाडी, स्टाफ कोटा स्वरूप २५ जना दिएकोमा सो कोटामा लगिएको कुरा क्यानको पत्र तथा सामाजिक सञ्जालबाट बुझिन्छ । सन्दीप लामिछाने विश्वकपको लागि अमेरिका जाने प्रक्रियामा क्यानका जिम्मेवार अध्यक्षबाट कुनै सम्बन्धित आधिकारिक निकायमा पहल कदमी नदेखिएको अवस्था छ ।’
नेकोस सङ्घले क्रिकेट सङ्घले विगत वर्षमा गरेको नेपाल प्रिमियर लिगमा समेत भ्रष्टाचार भएको आरोप लगाएको छ । सङ्घले यस्तो अख्तियारको दुरुपयोग गर्ने प्रकृतिका घटनाहरू दोहोरिइरहे आफूहरू आन्दोलनमा उत्रिन बाध्य हुने चेतावनी समेत दिएको छ ।
