काठामाडौं : आज (मंगलबार) दशैंको तेस्रो दिन । भगवती चन्द्रघण्टाको पूजा आराधना गरी मनाइँदै ।
गत आइतबार दशैंको पहिलो दिन घरघरमा घटस्थापना गरेसँगै नवदूर्गाका ९ रूपहरूको नौ दिनसम्म पूजा गर्ने परम्परा छ । जस अन्तर्गत आज भगवती चन्द्रघण्टाको पूजा आराधना गरी मनाइँदै छ ।
नवरात्रका नौ दिनमा पहिलो दिन शैलपुत्री, दोस्रो दिन ब्रम्हचारिणी, तेस्रो दिन चन्द्रघण्टा, चौंथो दिन कुष्माण्डा, पाँचौ दिन स्कन्दमाता, छौटौं दिन कात्यायनी, सातौं दिन कालरात्री, आठौं दिन महागौरी र नवौं दिन सिद्धिदात्रीको पूजा गर्ने गरिन्छ ।
दशैंको तेस्रो दिन देशभरीका नवदुर्गाका मन्दिर र शक्तिपीठहरुमा पूजा गरिँदै छ ।
आज राजधानीभित्र गुहेश्वरी, मैतिदेवी, दक्षिणकाली, कालिकास्थान, शोभा भगवती, तलेजुभवानी, विजेश्वरी, नक्साल भगवती, भद्रकाली र इन्द्रायणीसहितका देवी दुर्गाका शक्तिपीठहरूमा पूजा गरिन्छ भने उपत्यका बाहिर धरानको दन्तकाली, भोजपुरको सिद्दकाली, ताप्लेजुङको पाथिभारा, गोरखाको मनकामना लगायतका शक्तिपीठहरुमा पूजा गर्ने भक्तजनहरुको भीड लागेको छ ।
प्रतिपदादेखि पूर्णिमासम्म शक्ति स्वरुपा दुर्गा भवानीको नौ रुप शैलीपुत्री, ब्रम्हचारिणी चन्द्रघण्टा, कुष्माण्डा, स्कन्दमाता, कात्यायनी, कालरात्री, महागौरी र बुद्धिदात्रीका रुपमा पूजा गरिने भएकाले पनि दशैं चाड दुर्गा पूजाको नामले पनि प्रचलित छ ।
