दिल्ली : पाकिस्तानी गायक राहत फतेह अली खानमाथि विदेशी मुद्रा तस्करीको आरोप लागेको छ ।
मामलाको अनुसन्धान गरिरहेको इन्फोर्समेन्ट डिरेक्टोरेट (इडी्र)ले उनलाई यसबारे जवाफ दिन आदेश दिएको छ । मामिला तीन लाख ४० हजार डलरको अवैध विदेशी मुद्रासँग जोडिएको छ ।
इडी अधिकारीका अनुसार यो नोटिस सन् २०११ मा दिल्लीको इन्दिरा गान्धी इन्टरनेसनल एयरपोर्टमा राहतबाट बरामद गरिएको अमेरिकी डलरको मामलामा पठाइएको छ । स्मरण रहोस्, राहतसँग विदेशी मुद्रासँग जोडिएका कुनै पनि दस्तावेज भेटिएको थिएन ।
जारी हुनसक्छ लुक आउट नोटिस
न्यूज वेबसाइट फर्स्ट पोस्टको खबरअनुसार राहतले तीन लाख ४० हजार डलर (तीन करोड ८५ लाख रुपैयाँ) अवैध तरिकाले कमाएका थिए । यसमा उनले दुई लाख २५ हजार डलरको तस्करी गरे ।
राहतको जवाफबाट अनुसन्धान एजेन्सी सन्तुष्ट नभए उनलाई दुई लाख २५ हजार डलरको तीन सय प्रतिशतको हिसाबले जरिवाना तिर्नुपर्नेछ । र, यदि उनी जरिवाना दिन सक्दैनन् भने उनीविरुद्ध लुकआउट नोटिस जारी हुनेछ ।
