काठमाडौं– नेपाल–भारत सीमामा रहेका नेपालीलाई निश्चित अवधि पूरा गरेपछि स्वास्थ्य परीक्षण गरेर नेपाल ल्याइने प्रधानमन्त्री केपी शर्मा ओलीलले जनाएका छन् ।
मंगलबार देशबासीको नाममा सम्बोधन गर्दै उनले नेपालीहरूले सीमामा भोग्नु परेको अप्ठेरो र भावनालाई बुझेको बताए ।
उनले भने– ‘सङ्क्रमणको जोखिमलाई न्यून गर्न हामीले अन्तर्राष्ट्रिय सीमामा आवतजावत बन्द गर्नैपर्ने बाध्यता छ ।’
भारत सरकारसँग समन्वय गरी सीमाको पारीपट्टि २ हजार १ सय ४७ नेपालीहरूलाई उतै क्वारेण्टाइनमा राखिएको जानकारी गराए । सीमाको वारीपट्टि रहेका करिब ७०० भारतीय नागरिकहरूलाई पनि क्वारेण्टाइनमा राखिएको उनको भनाई थियो ।
विश्वव्यापी रुपमा सङ्क्रमण फैलिँदै जाँदा विदेशमा रहेका कतिपय नेपालीहरूमा पनि सङ्क्रमण देखा परेको छ । केहीको दुःखद निधन समेत भएको छ । यस्तो अवस्थामा लाखौँको सङ्ख्यामा विदेशमा रहेका नेपालीहरु आफ्नो स्वास्थ्य सुरक्षालाई लिएर, रोजगारी अथवा पढाइलाई लिएर र समग्र भविष्यलाई लिएर चिन्तितमा छन् ।
प्रधानमन्त्री ओलीले सम्बोधनको क्रममा यो सङ्कटको घडीमा सरकारको सहानुभूति, साथ र सद्भाव उनीहरूप्रति रहेको बताए ।
‘हाम्रा दूतावास र मिशनहरु प्रवासी र गैर आवासीय नेपालीहरुका समस्या समाधानमा क्रियाशील छन् । गैरआवासीय नेपाली सङ्घ लगायत सामुदायिक संस्थाहरुले पनि सक्दो सहयोग गरिरहेका छन्–’ उनले भने ।
साथै उनले विदेशमा रहेका नेपालीहरूको स्थितिका बारेमा राष्ट्रपति स्वयंले नेपाली दूतावासहरु मार्फत जानकारी लिइरहेको पनि जानकारी दिए ।
नेपाली श्रमिक बहुल रहेका विभिन्न मुलुकका प्रधानमन्त्रीहरुसंग आफूले टेलिफोन संवाद सुरु गरेको पनि जनाए ।
उनले भने– ‘सङ्कटको वर्तमान घडीमा जो जहाँ छौँ, त्यहीँ सुरक्षित रहौँ ।’