काठमाडौं : सर्वाेच्च अदालतसँगै देशभरिका अदालतमा आजदेखि सबै प्रकारका मुद्दाको नियमित सुनुवाइ शुरु भएको छ । करिब पाँच महिनापछि अदालतमा मुद्दाको नियमित सुनुवाइ शुरु भएको हो ।
विश्वलाई नै प्रभावित बनाएको कोरोना संक्रमण नेपालमा पनि देखापरेपछि सरकारकै आह्वानमा सरकारी कामकाज प्रभावित हुँदै आएको थियो । कहिले पुरै बन्द र कहिले एक तिहाइ त कहिले आधा कर्मचारीले सरकारी कार्यालय सञ्चालन हुँदै अएको थियो । सरकारी कार्यालय बन्द गर्नुपरेपछि देशभरिका अदालतमा समेत आकस्मिक बाहेकका कामकाज ठप्प भएको थियो । बन्दी प्रत्यक्षीकरण बाहेकका अन्य रिट निवेदन तथा मुद्दाको सुनुवाइ तत्काल स्थगित गरिएको थियो ।
पछिल्लोपटक सरकारले लकडाउन खुकुलो बनाउँदै निषेधाज्ञा पनि क्रमशः हटाउँदै जाने नीति लिएपछि सरकारी कार्यालय खुलेका छन् । सर्वाेच्च अदालतले पनि गत शुक्रबार विज्ञप्ति नै निकालेर आजदेखि सबै प्रकारका मुद्दा तथा रिट निवेदनको दर्ता तथा सुनुवाइ गरिने निर्णय सार्वजनिक गरेको थियो । ‘आजदेखि सबै प्रकारका मुद्दा तथा रिट निवेदनको सुनवाइ प्रारम्भ गरेका छौ’, सर्वाेच्चका सहायक प्रवक्ता देवेन्द्र ढकालले भने–‘इजलास पनि आठ वटा तोकिएको छ ।’
सर्वाेच्चले आजका लागि ११ जना न्यायाधीशको आठ वटा इजलास तोकेको छ । सात जना न्यायाधीशको संयुक्त इजलास र एक जना न्यायाधीशको एकल इजलास तोकिएको उनले बताए । आठ वटा इजलासमा कुल १०३ थान मुद्दा सुनुवाइका लागि पेशी तोकिएको छ । अब क्रमशः इजलास संख्या बढदै जाने र विस्तारै न्यायिक कामकारबाही पूर्ववत रुपमा सञ्चालन हुने बताउँदै उनले तर त्यस क्रममा स्वास्थ्य सुरक्षाको मापदण्ड भने अपनाइने जानकारी दिए ।
सर्वाेच्चको यो निर्णयसँगै देशभरिका उच्च अदालत र जिल्ला अदालतमा पनि स्वास्थ्य सुरक्षा मापदण्डका साथ न्याय सम्पादन कार्य शुरु भएको बताइएको छ । लामो समयसम्म अदालतको कामकारबाही प्रभावित हुँदा न्याय पाउने हकबाट वञ्चित हुनुपर्ने अवस्था सृजना भएकाले सञ्चालनको निर्णय गरिएको सर्वाेच्च अदालतले जनाएको छ ।
