काठमाडौंः युक्रेनमा सैन्य विमान दुर्घटना हुँदा २२ जनाको ज्यान गएको छ ।
वायुसेनाका प्रशिक्षार्थी लिएर उडेको एन्टोनोभ २६ विमान कारकिभको पूर्वी शहरमा दुर्घटना भएको बिबिसीले जनाएको छ । चालक दलका सदस्यसहित २७ जना रहेको विमानमा अहिलेसम्म २२ जनाको शव भेटिएको छ भने २ जना घाइतेको जीवितै उद्धार गरिएको छ ।
दुर्घटनामा परेको विमानमा आगो लागेको थियो जसलाई केही बेरमा नियन्त्रणमा लिइएको थियो । विमानमा सवार ३ जना अझै हराइरहेका छन् । उनीहरुको खोजी भैरहेको छ । विमान दुर्घटनाको कारण भने खुलेको छैन ।
खार्किभका क्षेत्रीय गभर्नर ओलेक्सी कुचेरका अनुसार प्रारम्भिक सूचनामा एक जना पाइलटले दुर्घटना हुनुभन्दा केही समयअघि एउटा इन्जिनमा खराबी आएको रिपोर्टिङ गरेका थिए । तर यो समस्या दुर्घटना नै निम्तिनेसम्मको गम्भीर नहुनुपर्ने र घटना निकै स्तब्धपूर्ण र दुखद भएको कुचेरलाई उद्धृत गर्दै युक्रेनी समाचार एजेन्सीले जनाएको छ ।
प्रकाशितः १० असोज, २०७७
