उदयपुर : मध्यपहाडी क्षेत्रको रौतामाई गाउँपालिका–२ भुटारमा बल्ल दशैंको समयमा बिजुली पुगेपछि गाउँलेमा खुशीयाली छाएको छ ।
उदयपुर क्षेत्र नं–२ का सांसद सुरेशकुमार राईको पहलमा सङ्घीय सरकारबाट रू एक करोड ७५ लाख र प्रदेश–१ सरकारका तर्फबाट रू एक करोडसहित रू दुई करोड ७५ लाखको लागतमा रौताको मुर्कुची बजारबाट ४० कोश टाढा उत्तरी पहाडी क्षेत्रको भुटारमा बिजुली ल्याइएको गाउँपालिकाका अध्यक्ष गजेन्द्र खड्काले बताए । सोमबारदेखि भुटार क्षेत्रमा बिजुली बल्न थालिएकाले दशैंको बेला सबै गाउँलेमा खुशी छाएको वडा नं–२का वडाध्यक्ष खबिन्द्र रासकोटीले जानकारी दिए ।
पहिलो पटक बिजुलीबत्ती बाल्न पाएकामा रन्जु ठकुरी खुशीहुँदै भनिन्, ,“कोरोनाको संक्रमणले अहिले सबै गाउँले दुःखी भइरहेका बेला ढिलै भए पनि दशैंको सम्मुख गाउँमा बिजुली आयो, राति गाउँ नै झलमल्ल हुन पुगेको छ, गाउँ उज्यालो देख्दा साह्रै खुशी लागेर आउँदो रहेछ, यसअघि राति अध्याँरो रहने गाउँ अहिले उज्यालो देख्न पाउँदा हामीहरू धेरै खुशी भएका छौ ।”
भुटारकै कमल राउतले पनि यसरी खुशी व्यक्त गरे,“अन्यत्र बिजुली बत्ती बल्दा हाम्रो गाउँघर अँधरो नै थियो तर गाउँमा छिटै बिजुली आयो, कोरोनाका कारण आफूहरूको खुशी खोसिए पनि दशैंको समयमा गाउँमा बिजुली आउँदा सबैं खुशी छौं, अहिले गाउँनै उज्यालो भएकोले आफूहरूले सबै दुखः बिर्सेजस्तो लाग्छ ।”भुटारका करिब २५० घरमा विद्युत बितरण गरिएको र अब अन्य वडामा पनि २०७८ सालभित्रै बिजुली बिस्तार गरिसक्ने लक्ष्य रहेको अध्यक्ष खड्काले बताए ।
