काठमाडौं । जनता समाजवादी पार्टी (जसपा)का संघीय परिषद् अध्यक्ष डा.बाबुराम भट्टराईको गृह प्रदेश गण्डकीमा जसपा शून्य भएको छ। गण्डकी प्रदेशका १० जिल्लामा ८४ स्थानीय तहमा जसपाले कुनै पनि स्थानीय तहमा जित हात पर्न नसकेपछि प्रदेशमा शून्य भएको छ ।
गण्डकी प्रदेशमा कास्कीको पोखरा महानगरपालिका र तनहुँको व्यास नगरपालिकाबाहेकका सबै स्थानीय तहको अन्तिम मत परिणाम आइसकेको छ। पोखरा महानगरमा नेकपा एकीकृत समाजवादीको उम्मेदवार अग्रता लिइरहेको छ, भने व्यास नगरपालिकामा स्वतन्त्र उम्मेदवार दिपक राज जोशीले अग्रता लिइरहेको छ ।
भट्टराईको गृहजिल्ला गोरखाका १० तहमध्ये कुनैपनि तहमा जसपाले जित निकाल्न सकेन्। गोरखामा माओवादी केन्द्रले ९ र नेपाली कांग्रेसले २ पालिका प्रमुख जितेको छ।
लमजुङका ८ स्थानीय तहमा एमाले र कांग्रेसले ४–४ वटा स्थानीय तहका प्रमुखमा जित निकालेको छ। तनहुँका ८ स्थानीय तहमध्ये नेपाली कांग्रेस ४, माओवादी केन्द्र १ र एमालेले ४ स्थानिय तहका प्रमुख जितेको छ। कांग्रेसका वरिष्ठ नेता रामचन्द्र पौडेलको गृहनगरसमेत रहेको व्यासमा सुरुदेखि नै स्वतन्त्र उम्मेदवार दीपकराज जोशीले अग्रता लिएका छन्।
११ स्थानीय तह रहेको स्याङ्जामा नेपाली कांग्रेसले ५ र एमालेले ६ स्थानिय तहमा जित निकालेको छ। कास्कीमा एमालेले ४ र कांग्रेसले ४ स्थानिय तहका प्रमुख जितेको छ। ९ स्थानिय तह रहेको कास्कीमा पोखरा महानगरपालिकाको मतपरिणाम आउन बाँकी छ।
मुस्ताङका ५ स्थानिय तहमध्ये एमालेले ४ र कांग्रेसले १ तहका प्रमुखमा जित निकालेको छ। पर्वतका ६ तहमध्ये एमाले ४ र कांग्रेस २ वटा तहका प्रमुखमा विजयी भएको छ।
बाग्लुङका १० स्थानिय तहमध्ये कांग्रेस ६, माओवादी केन्द्र १, राष्ट्रिय जनमोर्चा २ र एमाले १ वटा तहका प्रमुखमा जित निकालेको छ। बर्दघाट (सुस्ता पूर्व)का ८ स्थानीय तहमध्ये एमाले ६ र कांग्रेस २ तहमा विजयी भएको छ।
