एजेन्सी : बलिउड अभिनेता गोविन्दाले हलिउडको ब्लकबस्टर फिल्म ‘अवतार’ रिजेक्ट गरेको बताएपछि सामाजिक सञ्जालमा ट्रोलको शिकार भएका छन्। उनीसँग दुःखी भएका फ्यानहरुले गोविन्दालाई कैयन् मिममा प्रयोग गरेका छन्।
हालै गोविन्दाले एक साक्षात्कारमा जेम्स क्यामरुनको पूरै विश्वको ध्यान तान्न सफल फिल्म ‘अवतार’ ४ सय १० दिनमा छायांकन गर्नुपर्ने भएको र त्यो समय आफूसँग नभएकाले फिल्म छोडेको बताएका थिए। उनको यो अभिव्यक्तिपछि गोविन्दा सामाजिक सञ्जालमा निशानामा परेका छन्।
साक्षात्कारमा गोविन्दाले यो फिल्मका लागि आफू तयार नभएको खुलासा गरेका थिए। उनले दुई कारणले जेम्स क्यामरुनको फिल्म छोडेका थिए। गोविन्दाले भनेका थिए, जेम्सले यो भविष्यवाणी गरेका थिए कि यो फिल्म ८/९ वर्ष लाग्नेछ। र, यो रिलिज भएपछि सफल हुनेछ।
५५ वर्षीय अभिनेताले भने, यो फिल्ममा जुन शीर्षक दिइएको छ। त्यो मैले नै दिएको हो। मैले यो पनि भनेको थिएँ कि, यो फिल्म बन्न कमसेकम ७ वर्ष लाग्नेछ। जेम्स क्यामरुनको फिल्म ‘अवतार’ संसारमै सबैभन्दा धेरै कमाइ गर्ने फिल्मको सूचीमा पहिलो नम्बरमा थियो। हालै रिलिज भएको ‘एभेन्जरर्सः इन्डगेम’ ले ‘अवतार’ को कमाइलाई उछिनेको छ।
