एजेन्सी : बलिउड स्टार आमिर खान पछिल्लो समय खासै चल्न सकेका छैनन्। लामो अन्तरालमा दर्शकमाझ आउने आमिर त्यही चलचित्रबाटै वाहवाही कमाउथे। उनको चलचित्रलाई भारतीय दर्शक मात्र नभएर विश्वभरका दर्शकले साथ दिन्थे। तर पछिल्ला केही चलचित्र हेर्दा अब त्यो अवस्था रहेन।
गत वर्षको प्रदर्शनमा आएको चलचित्र ‘ठग्स अफ हिन्दुस्तान’ पनि नचलेपछि उनी नयाँ प्रोजेक्टमा व्यस्त छन्। उनले घोषणा गरेको नयाँ चलचित्रको नाम, ‘लाल सिंह चड्डा’ हो। यो चलचित्रका लागि आमिरको गेटअप समेत बदलिएको छ। यो चलचित्रमा नायिका करिना कपुर देखिदैछिन्।
यो चलचित्र सन् २०२० को क्रिसमसमा रिलिज हुँदैछ। तर, अब भने आमिरले क्रिसमसमा सोलो रिलिजको अवसर नपाउने भएका छन्। यो मितिमा नायक अक्षय कुमारको मुख्य भूमिका रहने चलचित्र ‘बच्चन पाण्डे’ रिलिज हुने भएको छ।
यो चलचित्रको फस्टलुक सहित प्रदर्शन मिति तय गरिएको हो। यो चलचित्रलाई साजिद नाडियाडवालाले निर्माण गर्न लागेका हुन्। चलचित्रलाई फरहाद साम्जीले निर्देशन गर्दैछन्। ‘बच्चन पाण्डे’ एक्सन चलचित्र हो। क्रिसमसमा लक्की मानिदै आएका आमिरलाई यसपटक भने अक्षयले ठूलै चुनौती दिने विश्लेषण गरिएको छ।
