बारा । बाराको जितपुरसिमरा उपमहानगरपालिका९२३ भलुहीमा प्रहरी र डाँकाबीच भएको दोहोर भिडन्त भएको छ । मध्यराती करिब १२ः०५ बजे एरोटेक प्रा.लिमा दोहरो भिडन्त भएको हो ।
बाराको जितपुरसिमरा उपमहानगरपालिका ९२३ भलुहीमा रहेको एरोटेक प्रा.लि. सिलिन्टर कम्पनीमा काकाहरूका समुहले लुटपाट गरिरहेको सूचना पाएलगतै घटना स्थलमा प्रहरी पुगेको थियो । करिब २० जनाको समुहमा आएका डाँकाहरुले उद्योग भित्र लुटपाट गरिरहेका बेला प्रहरी र डाँकाबीच दोहोर भिडन्त भएको हो ।
दोहोर भिडन्तमा डाँकाले १ राउन्ड र प्रहरीले ३ राउन्ड गोली चलाएको बाराका प्रहरी उपरीक्षक होबिन्द्र बोगटीले जानकारी दिए । डाकाले चार राउन्ट फायर गरे पनि ३ राउन्ट नपड्केको र एक राउन्ट पड्केको थियो ।
प्रहरीले दोहोरो भिडन्तको क्रममा कटुवा पेस्तोल १ थान, एकनाले बन्दुक १ थान र गोली ३ थानसहित २ जना डाकालाई पक्राउ गरेको छ । प्रहरीले जितपुरसिमरा उपमहानगरपालिका ९९ छातापिपरा बस्ने जयराम पासवान र वडा नम्बर १० बलुवाबेहरा बस्ने जवाहिर महतोलाई पक्राउ गरेको बाराका प्रहरी उपरीक्षक बोगटीले जानकारी दिए ।
दोहोरो भिडन्तको क्रममा वरिष्ठ प्रहरी नायब निरीक्षक (सई) कलाम शाही घाइते भएका छन् । डाँका पक्रने क्रममा डाकाले प्रहार गरेको रडबाट शाही घाइते भएका हुन् ।
घाइते बरिष्ठ प्रहरी नायब निरीक्षक शाहीको वीरगञ्ज हेल्थ केयरमा उपचार भइरहेको जील्ला प्रहरी कार्यालय बाराले जनाएको छ । यता दोहरो भिडन्तमा घाइते एक जना डाँकाको अलपाइन अस्पताल सिमरामा उपचार भइरहेको जनाइएको छ ।