काठमाडौँ । जिल्ला प्रहरी परिसर काठमाडौँको टोलीले पूर्वमन्त्री तथा नेकपा एमालेका सचिव टोपबहादुर रायमाझीको सातदोबाटोस्थित निवासमा खानतलासी गरेको छ।प्रहरीले पक्राउ पुर्जी जारी गरे पनि उनी हालसम्म पक्राउ नपरेपछि प्रहरीले खानतलासी गरेको हो ।
जिल्ला प्रहरी परिसर काठमाडौँका प्रमुख एसएसपी दानबहादुर कार्कीले अर्घाखाँचीबाट निर्वाचित सांसद रायमाझीको निवासमा खानतलासी लिइएको जनाएका छन् । रायमाझी प्रहरीले पक्राउ पुर्जी जारी गरेपछि अर्घाखाँची हुँदै भैरहवासम्म आइपुगेका उनी त्यहाँबाट भने सम्पर्कविहीन बनेका थिए ।
रायमाझी र उनका छोरा सन्दीपविरुद्ध वैशाख २० मा वारेन्ट जारी भएको थियो । जिल्ला प्रहरी परिसर काठमाडौँले जिल्ला अदालत काठमाडौँबाट दुबै जनाविरद्ध पक्राउ पुर्जी लिएको थियो ।
वारेन्ट जारी भएपछि उनका छोरा पक्राउ परे पनि रायमाझी ‘फरार’ रहँदै आएका छन् । दुवै जनामाथि नेपालीलाई भुटानी शरणार्थी बनाएर अमेरिका पठाउने धन्दामा संलग्न रहेको आरोप छ ।