काठमाडौँ । नेदरल्याण्ड्सलाई पराजित गर्दै स्पेन पहिलो पटक महिला विश्वकप फुटबलको सेमिफाइनलमा प्रवेश गरेको छ । वेलिङ्ऊटनमा शुक्रबार भएको पहिलो क्वाटरफाइनलमा स्पेनले नेदरल्याण्ड्सलाई अतिरिक्त समयमा २-१ ले पराजित गर्दै अन्तिम चारमा स्थान बनाएको हो ।
साविक उपविजेता नेदरल्याण्ड्स भने क्वाटरफाइनलबाटै बाहिरिएको छ । निर्धारित समय १-१ गोलको बराबरीमा भएपछि समय थप गरिएको थियो । स्पेनका लागि ७१औँ मिनेटमा अल्बा मारिया रेडोन्डो फेररको स्थानमा मैदान प्रवेश गरेकी साल्माले अतिरिक्त समयमा विजयी गोल गरिन् ।
त्यसअघि ८१औँ मिनेटमा मारिया काल्डेन्टेले पेनाल्टीमा गोल गर्दै स्पेनलाई अग्रता दिलाएकी थिइन् । तर, स्पेन जित नजिक पुग्दा नेदरल्याण्ड्सका स्टेफानी भान डेर ग्राटले इन्जुरी टाइमको पहिलो मिनेटमा गोल गर्दै खेललाई अतिरिक्त समयमा पुर्याएकी हुन् । स्पेनले अब जापान र स्विडेनबिच शुक्रबारै हुने क्वाटरफाइनल खेलको विजेतासँग सेमिफाइनलमा खेल्नेछ ।
