काठमाडौँ । चैत महिनाका लागि अधिकांश वाणिज्य बैङ्कहरूले निक्षेपको ब्याजदर घटाएका छन् । बैङ्कहरूले सार्वजनिक गरेको नयाँ ब्याजदर तालिकाअनुसार फागुनको तुलनामा चैत महिनामा व्यक्तिगत मुद्दतीको औसत ब्याजदर ०.५ प्रतिशत विन्दुले घटेको हो । फागुन महिनामा २० वटै वाणिज्य बैङ्कहरूको व्यक्तिगत मुद्दतीमा औसत ब्याजदर ७.७५ प्रतिशत रहेकोमा चैत महिनाका लागि भने ७.२५ मा झरेको छ ।
एनआईसी एसिया बैङ्कले भने फागुनको तुलनामा चैतमा व्यक्तिगत मुद्दती निक्षेपमा ब्याजदर बढाएको छ । अनर्गल प्रचारका कारण सो बैङ्कबाट केही निक्षेप झिकिएपछि बैङ्कले तरलताको सहज व्यवस्थापन गर्न ब्याजदर बढाएको देखिन्छ । सो बैङ्कले चैतदेखि लागू गर्ने गरी व्यक्तिगत मुद्दतीमा दिने ब्याजदर सबैभन्दा धेरै ८.५४८ प्रतिशत रहेको छ ।
बैङ्कहरूले व्यक्तिगत मुद्दतीमा जति ब्याजदर तोकेका छन्, संस्थाहरूलाई त्यसको १ प्रतिशत विन्दु कम हुन्छ । प्रभु र ग्लोबल आईएमईले फागुनकै दरलाई निरन्तरता दिएका छन् भने बाँकी १७ बैङ्कले घटाएका छन् । बैङ्किङ प्रणालीमा अधिक तरलता र कर्जा प्रवाह न्यून भएसँगै बैङ्कहरूले ब्याजदर घटाउँदै लगेका छन् ।
बैंकहरूले व्यक्तिगत मुद्दतीमा तोकेको अधिकतम ब्याजदर
बैंक | फागुनको ब्याजदर | चैतको ब्याजदर |
कृषि विकास | ६.४४३ | ५.६६ |
एभरेष्ट | ८ | ६.५ |
नेपाल | ७.२५ | ७ |
लक्ष्मी सनराइज | ८ | ७.५ |
माछापुच्छ्रे | ८ | ७.७५ |
एनआईसी एसिया | ८ | ८.५४८ |
प्रभु | ७.५ | ७.५ |
स्टान्डर्ड चार्टर्ड | ७.३५ | ७ |
राष्ट्रिय वाणिज्य | ७.३५ | ७ |
नबिल | ७.७५ | ७.२५ |
ग्लोबल आईएमई | ७.६ | ७.६ |
सिद्धार्थ | ८ | ७.५ |
प्राइम कमर्सियल | ७.४ | ७.२५ |
कुमारी | ८.०१ | ७.५१ |
सानिमा | ७.५१ | ७.२५ |
हिमालयन | ८.१५ | ७.५ |
नेपाल एसबीआई | ८.१ | ७.०१ |
नेपाल इन्भेष्टमेन्ट | ८ | ७ |
एनएमबी | ८.५ | ७ |
सिटिजन्स | ८.२५ | ७.७५ |