स्विडेन : चार वर्षदेखि जारी गृहयुद्ध अन्त्य गर्ने उपायको खोजी गर्न यमन सरकार र विद्रोहीबीच स्विडेनमा शान्तिवार्ता सुरु हुँदैछ ।
संयुक्त राष्ट्रसंघको अगुवाइमा भइरहेको यो शान्तिवार्ता सन् २०१६ यता पहिलोपटक हुन लागेको हो । त्यस बखत एक सय दिनभन्दा बढी चलेको वार्ता युद्ध अन्त्य गर्न असफल भएको थियो । गृहयुद्धका क्रममा १० हजारभन्दा बढीको ज्यान गइसकेको छ भने एक करोड ४० लाखभन्दा बढी मानिस भोकमरीको चपेटामा परेका छन् ।
यमनमा साउदी अरेबिया समर्थित सरकार र इरान समर्थित हुथी विद्रोहीबीच सत्ताका लागि सशस्त्र सङ्घर्ष जारी छ ।
राष्ट्रसंघ स्रोतका अनुसार युद्धरत दुवै पक्षबीच विश्वासको वातावरण निर्माण गर्ने प्रयत्न भइरहेको छ । राष्ट्रसंघले यमनमा जारी हिंसात्मक एवं सशस्त्र द्वन्द्वले मानवीय सङ्कट निम्त्याएको जनाएको छ । पछिल्ला वर्षहरुमा फैलिएको भोकमरी, रोग र युद्धका साथै बालसैन्य भर्नाले यमन आक्रान्त छ ।
स्रोतका अनुसार हुथी विद्रोहीहरुले साना अन्तर्राष्ट्रिय विमानस्थल खुला गर्न अनुरोध गर्ने अपेक्षा गरिएको छ । साउदी अरेबिया समर्थित हवाई आक्रमणमा उक्त विमानस्थल क्षतिग्रस्त भएका कारण हाल बन्द अवस्थामा छ । साउदी गठबन्धनले यमनको हवाई क्षेत्रमा नियन्त्रण कायम गरिरहेका छन् ।
सरकारी प्रतिनिधिमण्डल स्रोतका अनुसार राष्ट्रपति अबेड्राब्बो मन्सुर हादीका प्रतिनिधिहरुले वार्तामा विद्रोहीले बिछ्याएका बारुदी सुरुङको विस्तृत नक्सा उपलब्ध गराउन आग्रह गर्नेछन् ।
दुवै पक्षका स्रोतले यमनमा तत्काल युद्धविरामका लागि आग्रह गर्ने र मानवीय सहायता उपलब्ध गराउन मार्ग खुला गर्ने विषय उठाउनेछन् ।
यसपटकका वार्ता स्विडेनको स्टकहोमबाट ६० किलोमिटर उत्तरमा हुनेछ । बाह्र सदस्यीय सरकारी प्रतिनिधिमण्डलको नेतृत्व यमन सरकारका विदेशमन्त्री खालेद अल–यमनीले गरेका छन् । उनी बुधबार साँझ स्टकहोम पुगेका छन् ।
यसअघि राष्ट्रसंघले सेप्टेम्बरमा वार्ता गर्नेगरी पहल गरे पनि अन्तिम समयमा सुरक्षाको कारण दर्शाउँदै हुथी विद्रोहीहरु वार्ताबाट अलग भएका थिए ।
सरकार र हुथी मङ्गलबार मात्र आआफ्ना नियन्त्रणमा रहेका कैदीबन्दी मुक्त गर्न सहमत भएका थिए । स्विडेन वार्तालगत्तै अन्तर्राष्ट्रिय रेडक्रस समितिको रोहबरमा ती कैदीबन्दी आदानप्रदान गरिने एएफपीले जनाएको छ ।
