बुटवल : मोफसलको बुटवलमा पूर्ण स्वचालित अनलाइन सेयर कारोबार अहिलेसम्म पनि लागू भएको छैन । लगानीकर्ताले अनलाइनमार्फत सेयर कारोबार गर्न ‘युजर नेम’ र ‘पासवर्ड’ लिनुपर्छ ।
नेपाल स्टक एक्सचेन्ज (नेप्से) ले (ब्रोकर) दलाल कार्यालयमार्फत अनलाइन सेयर कारोबार गर्न काठमाडौँमा केही लगानीकर्तालाई सहज भए पनि बुटवलमा यसको प्रयोग नभएको ब्रोकर कार्यालयले जनाएका छन् ।
'लगानीकर्ता साक्षर भएको अवस्था पनि छैन र अनलाइन कारोबार गर्ने विषयमा दलाल कार्यालयसँग सम्झौता भएको छैन’, दक्षिणकाली सेक्युरिटिज प्रालि बुटवलका प्रकाश अधिकारीले भने ।
उनले सेयर दलाल कार्यालयलाई लगानीकर्ताले कारोबार गर्ने निश्चत रकमको केही प्रतिशत दलाल कार्यालयलाई बुझाउनुपर्ने झन्झटसमेत भएकाले पूर्ण स्वचालित अनलाइन प्रणालीमा रुचि कम देखिएको हुनसक्ने बताए ।
एसियन सेक्युरिटिज प्रालि बुटवल शाखाका पुष्पनिधि ढकालले पूर्ण स्वचालित अनलाइन प्रणालीको लागि केन्द्रीय निर्देशन पनि नभएको र लगानीकर्ताले निश्चित रकम अग्रिम बुझाउने विषयमा जानकारी नभएकाले सम्झौतामा समेत समस्या हुन सक्ने अनुमान गरे ।
उनले भने, 'हामी भर्खरै आएर सेयर कारोबार सुरु गरेका छाैं, यसले सेयरमा लगानी गर्नुपर्छ भन्ने सोचको विकास भएको छ तर प्रविधिमैत्री हुन समय लाग्छ ।' सेयर बजारको साक्षरताका विषयमा काम गरिरहेको सफल नेपाल इन्भेष्टमेण्ट कम्पनीका अध्यक्ष कमल तिवारीले नेप्सेले भित्र्याएको सफ्टवेयरले काम नगरेका कारण लगानीकर्ता बुटवलमा अनलाइन प्रणालीमा जानका नसकेको बताए ।
उनले अनलाइन प्रणालीका लागि नयाँ सफ्टवेयर आवश्यक भएकोमा जोड दिँदै सेयर बजार कारोवारको लागि सचेतना पनि बढाउँदै लैजानुपर्ने बताए । लगानीकर्तालाई अनलाइनमार्फत सेयर कारोबार खुला गरिएको १० दिनमात्रै भएको छ ।
नेप्सेले युजर नेम र पासवर्ड दिए पनि बैंक खाता नम्बर र डिम्याट नम्बर अनलाइनमा इन्टिग्रेसन नभई अनलाइन प्रयोग प्रभावकारी हुन नसकेको बताइएको छ । अनलाइन प्रणालीमा जानका लागि लगानीकर्ताले सेयर दलाल कार्यालसँग सम्झौता गर्नुपर्छ । अर्थमन्त्री युवराज खतिवडाले कात्तिक २० गते पूर्ण स्वचालित अनलाइन प्रणाली सुरु गरेका थिए ।
