काठमाडौं : नेपाल पर्यटन बोर्डको आयोजना र नेपाल एसोसिएसन अफ टुर एन्ड ट्राभल एजेन्ट्स (नाट्टा) कार्यान्वयन जिम्मेवारीमा लुम्बिनीमा हुने पहिलो बुद्धिस्ट इन्टरनेसनल ट्राभल मार्ट (बिआइटिएम) मा ३० देशको सहभागिता हुने भएको छ।
जनवरी १० देखि १२ तारिखसम्म हुने मार्टमा ३० देशका ट्राभल एजेन्सी, पर्यटन प्रवद्र्धनमा क्रियाशील सञ्चार माध्यम, पर्यटनसँग सम्बन्धित ब्लगर तथा वक्ताको सहभागिता हुने निश्चित भएको हो। नाट्टाका अध्यक्ष सिएन पाण्डेका अनुसार मार्टमा सहभागी हुनका लागि ३० देशलाई औपचारिक निमन्त्रणा गरिएको थियो। ‘निमन्त्रणा पठाएका सबै देशले मार्टमा सहभागी हुनका लागि आवेदन गरेका छन्,’ अध्यक्ष पाण्डेले भने, ‘सोचेभन्दा धेरैको आवेदन आएकाले छनोट भने भइसकेको छैन।’
उनका अनुसार मार्टमा सहभागिताका लागि ती देशका प्रतिनिधिले आवेदन दिनुपर्छ। धेरै आवेदन आएका खण्डमा मापदण्ड बनाएर छनोट गरिनेछ। ‘सोचेभन्दा धेरै आवेदन आएका छन्,’ उनले भने, ‘एउटा देशबाट कति जना र कस्ता प्रतिनिधिलाई सहभागिता गराउने भनेर मापदण्ड अनुसार छनोट गर्नेछौं।’ नाटाले छनोटको काम अगाडि बढाए पनि सम्पन्न भने गरिसकेको छैन ।
कार्यक्रमका सदस्य सचिव तथा कार्यक्रम संयोजक अच्युत गुरागाईका अनुसार मार्टमा एक देशबाट बढीमा पाँच जनासम्म सहभागिता गराइनेछ। विशेषगरी बौद्ध धर्म मान्ने देशहरुलाई केन्द्रमा राखेर मापदण्ड बनाइएको छ। अझ, बढी केन्द्रमा चाही छिमेकी मुलुक भारत र चीनलाई राखेको उनले बताए। ‘छिमेकी मुलकबाटै बढी बौद्ध धर्मावलम्बीहरु आउने गर्छन्,’ उनले भने, ‘ती देशहरु हाम्रो केन्द्रबिन्दुमा रहनेछन्।’
कार्यक्रम संयोजक गुरागाईका अनुसार मार्टले अन्तर्राष्ट्रियस्तरमा नेपालको पर्यटन प्रवद्र्धन हुने अपेक्षा राखेको छ। लुम्विनी गौतम बुद्धको जन्मस्थल भएकाले संसारभरका वौद्ध धर्मावलम्बीहरु नेपालमा आउन चाहन्छन्। भैरहवामा निर्माणाधीन गौतम बुद्ध अन्तर्राष्ट्रिय विमानस्थल सञ्चालनमा आएपछि झनै सहज हुने बताइएको नागरिकमा खवर छ ।
सरकारले भ्रमण वर्ष सन् २०२० मा २० लाख पर्यटक भित्र्याउने लक्ष्य लिएको छ। मार्टले पर्यटन वर्षको प्रचारप्रसारमा पनि सहयोग पु-याउने अनुमान आयोजकको छ। ‘एक्सप्लोर द बुद्ध ल्यान्ड, गेटवे टू बुद्धिस्ट सर्किट’ भन्ने मूल नारासहित आयोजना हुन लागेको मार्ट संस्कृति, पर्यटन तथा नागरिक उड्डयन मन्त्रालयका सचिवको अध्यक्षतामा समिति गठन भएको छ।
