काठमाडौं : राष्ट्रिय जनता पार्टी नेपालका अध्यक्ष मण्डलका संयोजक राजेन्द्र महतोले रेशम चौधरीले सांसदको पद तथा गोपनियताको शपथ लिनु स्वागतयोग्य भएको बताएका छन् ।
चौधरीले सिंहदरबारस्थित संघीय संसदमा शपथ लिएलगत्तै महतोले सरकारको यस कदमलाई आफूहरुले सकारात्मक रूपमा लिएको बताए ।
चौधरीको शपथग्रहणले जनताको अभिमत र लोकतन्त्रको सम्मान भएको महतोले बताए । सरकारले ढिलै भए पनि चौधरीलाई सांसदको लोगो दिएकोमा उनले खुसी व्यक्त गरे ।
महतोले चौधरी सांसदको लोगोको हकदार भएको र सरकारले चाैधरीलाई उनको हक दिएको भन्दै अब न्यायालयले पनि न्याय दिनुपर्ने धारणा राखे ।
सरकारको आगामी कदम संविधान संशोधन र लक्ष्मण थारू लगायतका बन्दीको रिहाइ हुनुपर्ने उनको विचार छ ।
