काठमाडौं : राष्ट्रिय दादुरा रुबेला प्रदेशस्तरीय खोप अभियान आजदेखि रुपन्देहीको सैनामैना नगरपालिका-४ स्थित मुर्गियाबाट शुरु भएको छ ।
प्रदेश नं.५ का मुख्यमन्त्री शंकर पोखरेलले एक नाबालकलाई पोलियो थोपा खुवाएर अभियानको शुभारम्भ गरे । रुपन्देहीमा ३ चरणमा १ लाख ९ हजार ७९९ बालबालिकालाई दादुरा रुबेला र एक लाख ३० हजारलाई पोलियो थोपा खुवाउने कार्यक्रम रहेको छ ।
फागुन १ देखि ९ गतेसम्म सात पालिका, फागुन १३ देखि १७ एक नगरपालिका र फागुन १६ देखि २४ गतेसम्म ८ पालिकाका ८१४ खोपकेन्द्रमा पोलियो थोपा तथा खोप लगाइने बताइएको छ । त्यसका लागि ९२८ कर्मचारी र १ हजार ६२८ स्वयंसेवक परिचालन भएको स्वाथ्य कार्यालय, रुपन्देहीका खोप अधिकृत भेषराज शर्माले जानकारी दिए ।
कार्यक्रममा मुख्यमन्त्री पोखरेलले लुम्बिनी प्रादेशिक अस्पताल, बुटवल प्रदेशको गौरवको आयोजना भएको उल्लेख गर्दै जनताको नि ःशुल्क स्वास्थ्य सेवा पाउने अधिकारमा चुनौती भएकाले प्रादेशिक अस्पतालको सटर हटाइएको जानकारी दिए । उनले उक्त अस्पताललाई विशेषज्ञ सेवा पाउने अस्पतालको रूपमा समेत रुपान्तरण गर्न खोजेको बताउँदै अझै पनि स्वास्थ्य सेवा नागरिकको पहुँचमा पुग्न नसकेकोमा चिन्ता व्यक्त गरे ।
“स्वास्थ्यलाई मौलिक हकका रूपमा आत्मसात गरिएको छ र सरकारले आधारभूत स्वास्थ्य सेवा नि:शुल्कसमेत भनेको छ, तर व्यवाहरिक रूपमा त्यस्तो देखिएको छैन” उनले भने । राष्ट्रियसभामा सत्तारुढ दलका सचेतक खिमलाल भट्टराईले जनताको स्वास्थ्य अधिकारप्रति सबैको साझा दायित्व आवश्यक भएको बताए ।
सैनामैना नगरपालिकाका प्रमुख चित्रबहादुर कार्कीले स्वास्थ्य सेवालाई प्रभावकारी बनाउन विशेषज्ञ चिकित्सकसहितको सेवा नगरपालिकामा शुरु भएको जानकारी दिए । स्वास्थ्य कार्यालय रुपन्देहीका प्रमुख डा.राजेन्द्र गिरी, स्वास्थ्य अधिकृत वसन्तकुमार श्रेष्ठलगायतले पोलियो थोपा र खोपको फाइदाका विषयमा जानकारी दिए ।
संघीय सरकारले ३० लाख बालबालिकालाई दादुरा रुबेलाविरुद्धको खोप प्रदान गर्ने र तराईका १९ जिल्लाका बालबालिकालाई पोलियो थोपा खुवाउने लक्ष्य लिएको छ । रासस
