एजेन्सी : इटालियन सिरी ‘ए’ फुटबलमा युभेन्टसले पर्मासँग ३–३ गोलको बराबरी खेलेको छ ।
शनिबार राति युभेन्टसको घरेलु मैदानमा भएको खेलको ३६औं मिनेटमा रोनाल्डोले गोल गर्दै १–० को अग्रता दिलाए । ६२औं मिनेटमा ड्यानियल रुगानीले गोल गरेपछि युभेन्टस्ले २–० को अग्रता बनायो ।
त्यसको दुई मिनेटपछि पर्माका एन्टेनियो बारिल्लाले गोल गर्दै खेलमा २–१ को स्थिति बनाए । ६६औं मिनेटमा रोनाल्डोले व्यक्तिगत दोस्रो गोल गर्दै युभेन्टसलाई ३–१ ले अघि बढाए ।
७४औं मिनेटमा पर्माका जेरभिन्होले गोल गर्दै खेलमा ३–२ बनाए । इन्ज्युरी समयको थप गरिएको तेस्रो मिनेटमा जेरभिन्होले अर्को गोल गर्दै खेललाई ३–३ गोलको बराबरीमा ल्याए ।
बराबरीपछि शीर्षस्थानमा रहेको युभेन्टसको २२ खेलबाट ६० अंक पुगेको छ । पर्मा २९ अंक जोडेर १२औं स्थानमा यथावत छ ।
