उदयपुर : शुक्रबार उदयपुरको त्रियुगा नगरपालिका–३ भल्के मस्जिदमा रहेका १६ जना मध्ये १२ जनामा कोरोनाभाइरस (कोभिड–१९) संक्रमण पुष्टि भएसँगै नेपाल प्रहरी र सशस्त्र प्रहरीले त्यस क्षेत्र सिल गरेको छ ।
स्थानीय प्रशासनले शुक्रबार रातिदेखि बस्तीलाई सुरक्षा घेरामा राखेको र आवतजावत बन्द गरिएको छ भने स्थानीयलाई घरबाट बाहिर निस्कन दिइएको छैन ।
प्रदेश १ को समाजिक विकास मन्त्रालयका सूचना अधिकारी बलराम पराजुलीले जमातीका लागि आएकामा कोरोना संक्रमणको पुष्टि भएपछि नेपाल प्रहरी र सशस्त्र प्रहरीले बस्तीलाई घेरा हालेर सिल गरेको हो ।
एकैपटक १२ जनाका कोरोना संक्रमण देखिएपछि अहिले स्थानीय नागरिक त्रसित बनेका छन् ।
प्रमुख जिल्ला अधिकारी दीपक कुमार पहाडीले संक्रमिकत व्यक्ति कहाँ–कहाँ गए, कस–कसलाई भेटे, उनीहरुलाई भेट्न मस्जिदमा को–को पुगे त्यस विषयमा अध्ययन भइरहेको बताए । अहिले उनीहरु गएको ठाउँ र भेट गरेका व्यक्तिको पहिचान हुने काम भइरेको उनले बताए ।
त्यस्तै प्रारम्भिक अनुसन्धानका क्रममा संक्रमितहरु भारतबाट आएका र बस्तीमा प्रवेश गरी ‘जाँड, रक्सी सेवन गर्न हुँदैन, धर्मप्रतिको विश्वासलाई जीवन्त राख्नुपर्छ’ जस्ता उपदेशहरु दिँदै हिँडेको स्थानीयले बताएका छन् ।
उनीहरु उपदेश दिने नाममा गाउँभरि हिँडेकाले थप व्यक्तिलाई पनि संक्रमण भएको हुनसक्ने अनुमान गरिएको छ ।
