धनगढी: डीपीएलको आजको खेलमा काडमाडौं गोल्डेन्सले धनगढी स्टार्सलाई ४ विकेटले पराजित गरी विजयी सुरुवात गरेको छ । फाप्ला अन्राष्ट्रिय रंगशालामा भएको खेलमा काठमाडौंका मेहवुव आलमले चौका प्रहार गरी टिमलाई १ बल बाँकी रहँदै जीत दिलाए ।
धनगढीविरुद्ध काठमाडौंका अग्रपङ्तीका ब्याटस्म्यान गौरव तोमर, अङ्कीत डबास र अनिल कूमार शाहले राम्रो प्रदर्शन गरे पनि मध्यक्रमका ब्याट्सम्यान चल्न नसक्दा काठमाडौंको ब्याटिङ कमजोर देखिएको थियो । तर, पाँचै विकेटका रुपमा मैदान प्रवेश गरेका मेहवुव आलम र सातौं विकेटका रुपमा मैदान प्रवेश गरेका विक्रम भुषालले नटआउट रहँदै क्रमैसँग १२ तथा १४ रन बनाउँदा काठमाडौंले १ बल बाँकी रहँदा लक्ष्य पुरा गर्यो ।
काठमाडौंविरुद्ध धनगढीका रोहन मुस्तफाले उत्कृष्ट बलिङ गरेपनि टिमलाई जित दिलाउन भने सकेनन् । उनले ४ ओभर बलिङ गर्दै २७ रन खर्चेर ४ विकेट लिए । त्यस्तै, अमिर हायत र विपीन खत्र्रीले समान १-१ विकट लिएका थिए । यसअघि टस हारेर पहिलो ब्याटिङ गरेको धनगढीका लागि अमित श्रेष्ठले उत्कृष्ट ब्याटिङ गरेका थिए । उनको अर्धशतकमा धनगढीले काठमाडौंलाई १ सय ३३ रनको लक्ष्य दिएको थियो । २० ओभर पुरा खेलेको धनगढीले ५ विकेट गुमाएर १ सय ३२ रन बनाएको थियो ।
काठमाडौंविरुद्ध उत्कृष्ट ब्यटिङ गरेका युवा ब्याट्सम्यान अमित श्रेष्ठले ४ चौका र २ छक्काको मद्दतमा अर्धशतक पुरा गरे । उनले ५० बल खेल्दै ५० रन बनाउँदा काठमाडौंका नन्दन यादवबाट बोल्ड आउट भए । त्यस्तै, धनगढीका लागि सन्दीप रजालीले २८ रन, सौरभ खनालले २५ रन बनाउँदा पवन शराफले १९ रन बनाएका थिए । टस जितेर पहिलो फिल्डिङ रोजेको काठमाडौंका लागि नन्दन यादवले उत्कृष्ट बलि गरे । उनले ३ ओभर बलिङ गर्दै ८ रन खर्चेर २ विकेट लिएका थिए ।
त्यस्तै, ललितनारायण राजवंशी र अंकित डवासले समान १-१ विकेट लिएका थिए । आज नै हुने दोस्रो खेलमा रुपन्देही च्यालेञ्जर्स र महेन्द्रनगर युनाइटेडबीच प्रतिस्पर्धा हुनेछ । खेल दिउँसो १ बजेबाट शुरु हुनेछ । रुपन्देही बसन्त रेग्मीको कप्तानीमा मैदान उत्रिने छ भने महेन्द्रनगर शरद भेषवाकरको कप्तानीमा मैदान उत्रिदैछ । प्रतियोगिताको विजेताले ३० लाख नगद पुरस्कार पाउने छ । उपविजेताले १२ लाख, तेस्रो हुनेले ४ लाख र चौथो हुने टोलीले २ लाख नगद पुरस्कार पाउने छन् ।
