सिरहा : सिरहामा पोखरीको विषयलाई लिएर दुईपक्षबीच विवाद हुँदा झडप भएको छ । सुखीपुर नगरपालिका–२ स्थित विद्यानगरमा रहेको सिकिया पोखरीमा माछा मार्ने विषयलाई लिएर दुईपक्षबीच भएको विवादले उग्र रूप लिँदा झडप भएको हो ।
झडप नियन्त्रण गर्न प्रहरीले ५ राउण्ड हवाई फायर गरेको थियो ।
सुखीपुर नगरपालिकाले ठेक्का लगाएको पोखरीमा स्थानीय माछा मार्न जाँदा ठेकेदारले रोकेपछि विवाद चुलिएको थियो । भनाभन उग्र भएपछि अवस्था तनावग्रस्त भएको र स्थितिलाई नियन्त्रणमा लिन हवाई फायर गर्नुपरेको प्रहरीले जनाएको छ ।
झडपमा ११ जना घाइते भएका छन् ।
व्यक्तिगत स्वामित्वमा रहेको पोखरी नगरपालिकाले ठेक्कामा लगाएपछि झडपको अवस्था सिर्जना भएको स्थानीयले बताएका छन् ।
