चितवन : निजी क्षेत्रको चितवन मेडिकल कलेज शिक्षण अस्पताल भरतपुरले पनि मिर्गौैला प्रत्यारोपण गर्ने अनुमति पाएको छ । यो अस्पतालले अनुमति पाएसंगै नेपालमा निजी पाँच सहित आठ अस्पतालमा मिर्गौला प्रत्यारोपण हुने भएको हो ।
अंग प्रत्यारोपण समन्वय समितिको बैठकले अस्पताललाई मिर्गौला प्रत्यारोपण गर्न अनुमति प्रदान गरेको हो । यसअघि सरकारी तर्फबाट त्रिवि शिक्षण अस्पताल महाराजगञ्ज काठमाडौँ, वीर अस्पताल काठमाडौँ र शहिद धर्मभक्त राष्ट्रिय प्रत्यारोपण केन्द्र भक्तपुरले मिर्गौैला प्रत्यारोपणको अनुमति पाएर सेवा समेत दिइरहेका छन् ।
निजी तर्फ कलेज अफ मेडिकल साइन्सेज (पुरानो मेडिकल कलेज) टिचिङ हस्पिटल भरतपुर, निदान अस्पताल पुल्चोक, ग्राण्डी अस्पताल धापासी ले अनुमति पाएर प्रत्यारोपण गरिसकेका छन् गत ७ फागुनमा अनुमति पाएको सुमेरु अस्पताल धापाखेलले भने प्रत्यारोपणको तयारीमा लागेको बुझिएको छ ।
समितिका सदस्य सचिव एवं स्वास्थ्य सेवा विभागका महानिर्देशक डा. गुणराज लोहनीले अस्पतालको भौतिक पूर्वाधार, प्राविधिक उपकरण, जनशक्ति लगायतको स्थलगत अध्ययन पछि सीएमसीलाई मिर्गौला प्रत्यारोपणका लागि अनुमति दिएको बताए ।
नेपालमा मिर्गौला प्रत्यारोपणको इतिहास हेर्दा सन् २००८ को अगस्ट ८ मा त्रिवि शिक्षण अस्पतालमा पहिलो पटक प्रत्यारोपण भएको थियो ।
