‘द कपिल शर्मा शो' बाट ख्याती कमाएका भातीय हास्य कलाकार कपिल शर्मा आजकल ‘द कपिल शर्मा शो सिजन टु’ बाट सबैलाई मनोरञ्जन प्रदान गरिरहेका छन् ।
यसैबीच कपिल शर्माले आफ्नो कार्यक्रमबाट ब्रेक लिने खबर सार्वजनिक भएको छ । कपिलले यो ब्रेक आफ्नो घरमा आउन लागेको नयाँ पाहुनाका लागि लिइरहेका छन् ।
बलिउड लाइफको रिपोर्ट अनुसार, कपिल शर्मा चाँडै नै मिनी ब्रेकमा जाँदैछन् । कपिल शर्माकी श्रीमती गिन्नी चतरथ तीन-चार महिनाकी गर्भवती छिन् । कपिल शर्मा आफ्नी गर्भवती श्रीमतीसहित बेबी मुनमा जाने योजनामा छन् । खबरका अनुसार यी दुई क्यानडा घुम्न जाने तयारीमा छन् ।
गिन्नी चतरथसँग विवाह गरेलगत्तै उनी 'द कपिल शर्मा शो'मा फिर्ता भएका थिए जसका कारण उनीहरु हनिमुनमा पनि जान पाएका थिएनन् । आफ्नी पत्नीका लागि कपिलले शोबाट ब्रेक लिन लागेको खबर भारतीय संचार माध्यमले बताएका छन् ।