काठमाडौं । प्रमुख प्रतिपक्षी दल नेकपा एमालेका महासचिव शंकर पोख्रेलले प्रचण्ड र माधवरहित वाम एकताको पक्षमा एमाले रहेको बताएका छन् ।
प्रेस चौतारी दाङले घोराहीमा गरेको पत्रकार सम्मेलनमा महासचिव पोख्रेलले पुष्पकमल दाहाल प्रचण्ड र माधव नेपालसँग बामएकताको सम्भवना नरहेको तर माओवादी र एकीकृत समाजवादीका कार्यकर्तालाई एकतावद्ध गर्ने पक्षमा भने एमाले रहेको बताएका हुन् ।
साथै महासचिव पोख्रेलले आगामी ३० वैशाखमा हुने स्थानीय तहको चुनावमा एमालेले कुनै दलसँग तालमेल नगरी एक्लै चुनाव लड्ने पनि बताएका छन् ।
राप्रपा, सिके राउतका दलसँगको तालमेलको सम्भवना के छ भन्ने पत्रकारको जिज्ञासामा उनले एमालेले पार्टीगत तालमेलको पक्षमा नरहेको बताएका हुन् । उनले सत्तारुढ गठबन्धनका दलले एमालेले राजवादी दलसँग तालमेल हुँदैछ भनेर भ्रम फैलाएको समेत आरोप लगाएका छन् ।
पोख्रेलले एमालेले नेताभन्दा पनि विभिन्न दलमा कार्यकर्ताहरूलाई जोड्दै बलियो शक्ति निर्माण गर्दै अगाडि बढ्ने बताएका छन् । अहिलेको पाँच दलीय गठबन्ध बमपन्थी आन्दोलन र लोकतन्त्र मान्यताको विरुद्धमा भएको टिप्पणी समेत गर्दै उनले काङ्ग्रेससँगको तालमेल जनताले दिएको जनादेशको विपरित भएको बताएका छन् ।
