काठमाडौं । सेयर बजार परिसूचक नेप्सेमा एकल अंकको सामान्य गिरावट भएको छ। साताको तेस्रो कारोबार दिन मंगलबार बजार परिसूचक नेप्से ६.५९ अंक ०.३५ प्रतिशतले गिरावट भएर १८९६.३८ अंकमा बन्द भएको छ ।
मंगलबार बैंकिङ, निर्जीवन बीमा कम्पनी, व्यापार उपसूचकमा वृद्धि भएको छ भने त्यसबाहेकका सबै उपसूचक घटेको छ। विकास बैंक, वित्त कम्पनी र उत्पादनमुलक उपसूचक भने १ प्रतिशत माथिले गिरावट भएको छ।
नेप्सेमा गिरावट भएपनि कारोबार रकम भने केही वृद्धि भएर १ अर्ब नाघेको छ। सोमबार करिब ९५ करोडको कारोबार भएको बजारमा मंगलबार २७ लाख ४५ हजार १०९ कित्ता सेयर किनबेच हुँदा १ अर्ब २ करोड ३६ लाख १० हजारको कारोबार भएको छ। जसमध्ये हिमालयन डिस्टिलरीको सर्वाधिक ८ करोड २२ लाख ३५ हजारको कारोबार भएको छ।
त्यस्तै नेपाल लाइफ इन्स्योरेन्सको ६ करोड ४ लाख ९८ हजारको सेयर कारोबार हुँदा नेपाल दूरसञ्चार कम्पनीको ४ करोड ६७ लाख २२ हजारको कारोबार भएको छ।
मंगलबार नेप्सेमा कुल १८५ कम्पनीको सेयर कारोबार भएकोमा १३३ कम्पनीको सेयर मूल्यमा गिरावट भएको छ। यस्तै ४३ कम्पनीको सेयर मूल्य वृद्धि हुँदा ९ कम्पनीको भने स्थिर छ।
मंगलबार कारोबार भएकामध्ये सूचीकृत कम्पनीमा पञ्चकन्यामाई हाइड्रोपावरको सेयर मूल्य सर्वाधिक २.९३ प्रतिशतले वृद्धि हुँदा युनिलिभर नेपालको सेयर मूल्य २.०८ प्रतिशतले बढेको छ।
सिटिजन्स म्युचुअल फण्ड १ को इकाइ मूल्य ४.५८ प्रतिशतले वृद्धि हुँदा ग्लोबल आईएमई ब्यालेन्स फण्डको इकाइ मूल्य २.५६ प्रतिशत र लक्ष्मी इक्विटी फण्डको इकाइ मूल्य २.१२ प्रतिशतले बढेको छ।
तारागाउँ रिजेन्सी होटलको सेयर मूल्य सर्वाधिक ८.५६ प्रतिशतले गिरावट हुँदा सिक्लेस हाइड्रोपावरको ८.४२ प्रतिशत र ग्रामीण विकास लघुवित्तको सेयर मूल्य ६.२१ प्रतिशतले गिरावट भएको छ।
