काठमाडौं । नेपाली कांग्रेसका सभापति शेरबहादुर देउवा पक्षका केन्द्रीय सदस्यहरुले प्रदेशस्तरीय बैठक बस्ने भएका छन् । संस्थापन पक्षका केन्द्रीय सदस्यहरुले सातै प्रदेशमा छुट्टाछुट्टै बैठक बस्ने भएको हो।
सभापति देउवाले आफू निकटका नेताहरुलाई समन्वय गर्न जिम्मेवारी दिएका छन्। स्थानीय तहदेखि केन्द्रसम्मको टिकट वितरणमा समन्वय गरेका नेताहरुलाई बैठक बोलाउन जिम्मेवारी दिइएको छ।
‘सभापति देउवा पक्षका सबै केन्द्रीय सदस्यको बैठक बोलाउनुपर्ने माग थियो’, देउवा पक्षीय एक केन्द्रीय सदस्य भन्छन्, ‘धेरै जनाको बैठक बोलाउँदा आरोप प्रत्यारोप झन् बढी होला सोचेर सभापतिले प्रदेश प्रदेशको छुट्टाछुट्टै बैठक गर्न निर्देशन दिनु भएको छ।’
प्रदेश १ का देउवा पक्षको बैठक बुधबारका लागि बोलाइएको छ। पूर्वमन्त्री ज्ञानेन्द्र बहादुर कार्कीलाई प्रदेश १ का संस्थापन पक्षका केन्द्रीय सदस्यको बैठक गर्न देउवाले निर्देशन दिएका छन्। समसामयिक विषयमा छलफल गर्न बैठक गर्न लागिएको संस्थापनइतरका नेताहरुले बताएका छन् ।
देउवा पक्षीय एक नेताका अनुसार समन्वय गर्ने जिम्मेवारी पाएका नेताहरुले आफू अनुकूल समय मिलाएर सबै प्रदेशको बैठक बोलाउने उनले जानकारी दिए।
