काठमाडौँ । नेपाली काँग्रेसको पदाधिकारी तथा पूर्वपदाधिकारी बैठक सकिएको छ । आज बिहीबार बसेको बैठकले नेता बालकृष्ण खाँण नक्कली भुटानी शरणार्थी प्रकरणमा पक्राउ परेकोमा निलम्बन गर्नुपर्ने वा नगर्नुपर्ने विषमा कुनै निर्णय गरेको छैन ।
बैठकपछि पत्रकारहरूसँग कुरा गर्दै सहमहामन्त्री जीवन परियारले निलम्बन गर्नुपर्ने कुरा बैठकमा उठेको तर निष्कर्षमा नपुगेको बताएका छन् । उनले पत्रकारहरूले सोधेको प्रश्नको जवाफमा भने , ‘केही कुरा उठेको छ । तर कुनै पनि कुरामा निष्कर्षमा पुगेका छैनौँ ।
सहमहामन्त्री परियारका अनुसार खाँण अदालतबाट दोषी ठहर नभइसकेकाले पार्टीले आधिकारिक धारणा बनाएर जानु नहुने बताए । परियारले भने, ‘उहाँ छानबिनका लागि तयार हुनुभएको छ । हाम्रो पार्टीका नेताले अनुसन्धानका लागि सहयोग गर्नुभएको छ । नेकपा एमालेका पदाधिकारी आज पनि फरार हुनुहुन्छ । तर काँग्रेस दोषीलाई उम्काउने प्रयासमा छैन ।’
पदाधिकारी बैठकमा कोसी प्रदेशमा केन्द्रमा रहेको सत्तारुढ गठबन्धन अनुसारको सरकार नभएको बारे पनि छलफल भएको छ । प्रदेश विषयमा महामन्त्री द्वय गगन थापा र विश्वप्रकाश शर्मा , सहमहामन्त्री भीष्मराज आङ्देम्बेलाई छलफलको जिम्मा दिइएको जनाइएको छ ।
त्यस्तै आजको बैठकमा नागरिकता विधेयकका विषयमा पनि छलफल भएको र यस विषयमा कानुनविद्सँग राय लिने काँग्रेसको तयारी रहेको परियारले बताएका छन् ।