काठमाडौँ । सरकारले आर्थिक कार्यविधि तथा वित्तीय उत्तरदायित्व पहिलो संशोधन अध्यादेश, २०८० संसद्मा पेस गरेको छ । सोमवारबाट सुरु भएको सङ्घीय संसद्को तेस्रो अधिवेशनमा अर्थमन्त्री डा. प्रकाशशरण महतले सो अध्यादेश प्रतिनिधिसभा बैठकमा पेस गरेका हुन ।
नेपाल सरकारको नीति तथा कार्यक्रम र वार्षिक बजेट पेस गर्ने र सो प्रक्रियामा हुने छलफलको अवधि पर्याप्त गर्ने उद्देश्यले सो अध्यादेश प्रतिनिधि सभा बैठकमा पेस गरिएको महतले स्पष्ट पारे ।
मन्त्री महतले भने, ‘आर्थिक विधि तथा वित्तीय उत्तरदायित्व ऐन, २०७६ मा रहेको त्यस्ता समयावधि संशोधन आवश्यक भएको र सङ्घीय संसद्को अधिवेशन नभएकाले नेपालको संविधानको धारा ११४ को संवैधानिक व्यवस्था बमोजिम यो अध्यादेश जारी गर्नु परेकाले प्रतिनिधि सभा नियमावली २०७९ को नियम ९४ बमोजिम प्रतिनिधिसभा समक्ष प्रस्तुत गर्दछु ।’
