काठमाडौँ । इंग्लिस च्याम्पियन तथा साविक विजेता म्यानचेस्टर सिटी यूईएफए च्याम्पियन्स लिगको क्वाटरफाइनलमा प्रवेश गरेको छ । बुधबार राती सम्पन्न दोस्रो लेगको खेलमा एफसी कोपनहेगनलाई ३-१ ले पराजित गर्दै सिटीले क्वाटरफाइनलमा स्थान पक्का गरेको हो । पहिलो लेगमा ३-१ कै जित दर्ता गरेको सिटी समग्रमा ६-२ ले विजयी भयो ।
सिटी प्रतियोगिता इतिहासमा लगातार १० जित दर्ता गर्ने पहिलो इंग्लिस टिम पनि बनेको छ । समूह चरणको सबै खेल जितेको सिटीले अघिल्लो सिजन पनि लगातार जितको सिलसिला कायम राखेको थियो । सिटी च्याम्पियन्स लिग अन्तर्गत घरेलु मैदानमा ३० खेलयता अपराजित छ ।
घरेलु मैदान इतिहाद रंगशालामा सिटीले सुरुवाती ९ मिनेटमै २ गोल गरेर सहज जितको आधार तयार पारेको थियो । म्यानुएल अकान्जी र जुलियन अल्भारेजले गोल गरेका थिर ।
मोहमद एल्युनुसीले २९ औं मिनेटमा गोल फर्काएपनि सिटीले पहिलो हाफको इन्ज्युरी समयमा एर्लीङ हालान्ड मार्फत अग्रता बढायो । दोस्रो हाफमा दुवै टोलीले गोल नथप्दा सिटी अघि बढेको हो । एजेन्सी
