काठमाडौ : हङ्कङमा प्रहरी र प्रदर्शनकारीबीच झडपहरू भईरँहदा चीनका राष्ट्रपति सी जिन्पिङले हङ्कङमा जारी विरोधप्रदर्शनलाई सङ्केत गर्दै चीन विभाजन गर्न खोज्ने प्रयासलाई दमन गरिने कडा चेतावनी दिएको बिबिसीले जनाएको छ ।
चीनको सरकारी टेलिभिजन सीसीटीभीका अनुसार नेपालको राजकीय भ्रमणमा रहेकै बेला आइतवार सीले उक्त प्रतिक्रिया व्यक्त गरेका हुन्। सी आइतबार नेपालबाट स्वदेश फर्किसकेका छन् ।
उनले चीन विभाजन गर्ने खोज्ने प्रयास किचिएका शरीर र भाँचिएका हड्डीहरूमा टुङ्गिने चेतावनी दिएको बिबिसीले उल्लेख गरेको छ ।
आइतवार हङ्कङमा शान्तिपूर्ण र्यालीहरू निकालिएका भए पनि प्रदर्शनकारी र सुरक्षाकर्मीबीच झडपहरू भएका थिए। चिनियाँ सरकारको पक्षमा भएको भन्ठानिएका सार्वजनिक यातायातका स्टेशन र पसलहरूमा प्रदर्शनकारीहरूले आक्रमण गरी क्षति पुर्याएका थिए।
के हो हङ्कङ विवाद ?
बिबिसीका अनुसार केही समयअघि प्रस्तुत एउटा विधेयकमा मुख्यभूमि चीन, ताइवान र मकाऊबाट आपराधिक सुपुर्दगीको अनुरोध आएमा हङ्कङ अदालतले प्रत्येक मुद्दाका आधारमा गरेको निर्णयमा टेकेर सुपर्दगी गर्न सकिने व्यवस्था राखिएको थियो।
ताइवानमा बिदा मनाउन गएका बेला हङ्कङका एक व्यक्तिले आफ्नी प्रेमिकाको हत्या गरेको आरोप लागेपछि निजलाई ताइवानसमक्ष बुझाउन नसकेको सन्दर्भ पारेर यो विधेयक ल्याइएको थियो।
चीन सरकारले राजनीतिक विपक्षीहरूलाई तारो बनाउन सो विधेयकका आधारमा बन्ने कानुनको दुरुपयोग हुने त्रासका कारण हङ्कङमा त्यसको विरोध भएको थियो।
ठूलो विरोध भएपछि सो विधेयक फिर्ता भयो। तर हङ्कङमा पूर्ण प्रजातन्त्र र प्रहरी बर्बरताुको अनुसन्धानको मागसहित विरोधप्रदर्शन जारी छ। जुन महिनायता हङ्कङ आन्दोलित छ।
महिनौँदेखि चलेको सरकारविरोधी प्रदर्शन साम्य पार्न प्रमुख कार्यकारी क्यारी लामले उपनिवेशकालीन कानुन प्रयोग गर्दै यो महिनाको सुरुमा मास्क लगाउन प्रतिबन्ध लगाएकी थिइन्। धेरैले त्यसको विरोध गरेका थिए।
त्यहाँ नागरिक अवज्ञा सुरु भएयता कम्तीमा २३०० मानिस पक्राउ परेका छन्। त्यस क्रममै त्यहाँ विमानस्थल नै बन्द हुनेगरी ठूला प्रदर्शनहरू भएका थिए।
चीन सरकारले त्यसमा विदेशी हात रहेको भन्दै हस्तक्षेप गर्ने बताउँदै आएको छ। चीनले प्रदर्शनकारीहरूमाथि आतङ्ककारीजस्तो व्यवहार गरेको आरोप लगाएको छ।
