कैलाली : बैतडीको पाटन नगरपालिकामा पुराना सरकारी भवन प्रशस्त मात्रामा छन् । तर नगरपालिका भने निजी घरलाई कार्यालय प्रयोजनको लागि प्रयोग गर्दै आइरहेको छ ।
बैतडी जिल्लाका अधिकांश स्थानीय तहहरुसँग आफू बस्ने घर नहुँदा समस्यामा परेका छन् तर पाटन नगरपालिकासँग प्रशस्त मात्रामा भवन हुँदाहुँदै पनि घरभाडा तिरेर कार्यालय सञ्चालन गरिरहेको छ ।
नगरपालिका स्थापना हुनभन्दा पहिला जिल्लाका सरकारी कार्यालय रहेको पाटन नगरपालिकामा महिला तथा बालबालिकाको कार्यालय, कृषि सेवा केन्द्र र पशु सेवा कार्यालयका भवन नगरपालिकालाई हस्तान्त्रण गरिएका हुन् ।
नगरपालिकालाई हस्तान्तरण गरिएका यी कार्यालयहरु अहिले खाली देखिन्छन् । नगरपालिकाले भने निजी घरलाई वार्षिक ४ लाख ९८ हजार भाडामा लिएर सबै कार्यालयका शाखा निजी घरमा सञ्चालन गरेको छ ।
नगरपालिकाले खाली रहेका कार्यालयलाई भाडामा पनि दिएको छैन । नगरपालिकाले निजी घरलाई भाडा तिर्नुभन्दा पनि यी कार्यालयको मर्मत गरेर यी कार्यालयमा नै कार्यालय सञ्चालन गर्न स्थानीय सुझाउँछन् ।
अहिले नगरपालिकाको नयाँ भवन निर्माणाधिन अवस्थामा छ । कार्यालयहरु असोज २१ गते नगरपालिकालाई हस्तान्त्रण गरिए ।
अरु स्थानीय तहमा कुनै सरकारी कार्यालय नभएर साविकका गाविस भवनमा गाउँपालिका र नगरपालिकाका कार्यालय स्थापना गरिएका छन् भने पाटन नगरपालिकामा भने सरकारी भवन हुँदाहुँदै पनि निजी घरमा कार्यालय सञ्चालन गरिरहेका छन् ।
हस्तान्तरण गरिएका कार्यालय भवनहरुको मर्मत संम्भार गरि कार्यालय प्रयोजनमा ल्याउन नगरपालिकाले पहल गर्नु जरुरी देखिन्छ ।
