कोमल दिल यो चोरेर, के पाउँछिन् कुन्नी ?
गन्तव्य अन्यत्रै मोडेर, के पाउँछिन् कुन्नी ?
नौनी झै कोमल मुटु पारी छिया छिया
तिखा नजरले घोचेर, के पाउँछिन् कुन्नी ?
उनिकै दरवार अगाडि सधैं कुरि बसेछु म
अग्लो पर्खालले छेकेर, के पाउँछिन् कुन्नी ?
उमेर हुँदा खेरि त स्याल पनि घोर्ले हुन्छ,
बैंशको नशामा मातेर , के पाउँछिन् कुन्नी ?
म पनि सजाउथेँ मेरै मनको दरवारमा,
सपनीमा रानी बनेर के पाउँछिन् कुन्नी ?
पक्षताप गर्न पनि समय रहेन आज,
खै अँजुली थापी मागेर, के पाउँछिन् कुन्नी ?
दलदलमा फस्यौ ,के ती आँखा फुटेका थिए
अनुहार छोपी रोएर, के पाउँछिन् कुन्नी ?
– माधव पौडेल (असल यात्री)