काठमाडौं : संसदको सार्वजनिक लेखा समितिले चिनीको अधिकतम खुद्रा मूल्य प्रतिकिलो ६३ रुपैयाँ नै कायम गर्न सरकारलाई निर्देशन दिएको छ ।
बिहीबार बसेको समिति बैठकले उपसमितिको प्रतिवेदनका आधारमा सरकारलाई चिनीको खुद्रा मूल्य ६३ रुपैयाँ नै कायम गरी कडाइका साथ लागू गर्न सरकारलाई निर्देशन दिएको हो ।
गत असोज १८ गतेको लेखा समितिको निर्णय बमोजिम प्रधानमन्त्री केपी शर्मा ओलीको उपस्थितिमा सरोकारवालाहरुले प्रतिवद्धता जाहेर गरे अनुसार चिनीको गेट मूल्य ५३ र खुद्रा मूल्य ६३ कायम भएको भन्दै समितिले त्यही निर्णयलाई कडाइका साथ लागू गर्न सरकारलाई निर्देशन गरेको हो ।
लेखा समितिले चाडपर्वको समयमा काठमाडौं उपत्यकाबाट बाहिर जाने यात्रुहरुलाई सुरक्षित रुपमा यात्रा गर्ने वातावरण मिलाउनका लागि आवश्यक बस तथा माइक्रोबसको व्यवस्था गर्नसमेत सरकारलाई भनेको छ ।
हवाइ यातायातलाई समेत सहज र सर्वसुलभ बनाउन र खाद्य लगायत दैनिक उपभोग्य वस्तु सुपथ मुल्यमा उपभोक्ताले प्राप्त गर्ने वातावरण मिलाउन निर्देशन गरेको छ ।
समितिले अस्वभाविक मुल्यवृद्धि नियन्त्रण गर्न सरकारको ध्यानाकर्षण गरेको छ । वैठकमा समिति सदस्यहरुले चिनीको मूल्य व्यापारीले ९० रुपैयाँ वा एक सय रुपैयाँ लिए भने के गर्ने भन्दै प्रश्न गरेका थिए ।
