काठमाडौं : फेदीखोला गाउँपालिकाले कृषि एम्बुलेन्स सञ्चालनमा ल्याएको छ ।
कोरोना भाइरसको संक्रमण रोकथाम र नियन्त्रणका लागि सरकारले घोषणा गरेको लकडाउन लम्बिदै गएपछि चिन्तित बनेका किसान हर्षित भएका छन् ।
फेदीखोला गाउँपालिकाले बन्दका कारण किसानले उत्पादन गरेका तरकारीका साथै कृषिजन्य वस्तु किसानको घरघरमै पुगेर खरिद गर्ने व्यवस्था मिलाएपछि उनीहरु खुसी भएका हुन् ।
गाउँपालिका अध्यक्ष घनश्याम सुवेदीले लकडाउनका कारण किसानले उत्पादन गरेका तरकारीलगायतका खाद्यवस्तु बारीमै कुहिएर खेर जाने र बजारमा खाद्यवस्तुको अभाव हुने भएकाले किसानको घरघरमै पुगेर किसानले उत्पादन गरेका तरकारी फलफूललगायतका वस्तु गाउँपालिकाले खरिद गर्ने व्यवस्था मिलाएको बताए ।
वडा नं २ स्थित मुख्यमन्त्री नमूना कृषिगाउँ तल्लो कुडुलेका अध्यक्ष विष्णु सुवेदीले लकडाउनका कारण खेतबारीमै कुहिएर जान लागेको आफूहरुको तरकारी घरमै आएर पहिलेभन्दा बढी मूल्य दिएर खरिद गरेकामा खुशी लागेको बताए ।
गाउँपालिकाले जतिसक्दो उत्पादन गर्नुस् खरिद गर्ने जिम्मा पालिकाको भयो भनेर भनेकाले थप उत्साह बढेको उहाँले बताए । अर्का किसान फेदीखोला-४ का छाँयादत्त पौडेलले पनि गाउँपालिकाले किसानका लागि निकै राम्रो काम गरेको बताए । पशुपालन व्यवसाय गर्दै आउनुभएका पौडेलले आफूले उत्पादन गरेको पनिर गाउँपालिकाले घरमै आएर खरिद गरेर लैजाने गरेको बताउनुभयो । गाउँपालिकाले यसभन्दा पहिले कृषिमा पालिकालाई आत्मनिर्भर बनाउने उद्देश्यले किसानले उत्पादन गरेका वस्तुलाई १० प्रतिशत अनुदान दिँदै आएको थियो ।
लकडाउनको शुरु भएसँगै किसानको घरघरमा पुगेर उत्पादित वस्तु खरिद गर्न थालेपछि किसान थप हर्षित भएका छन् । किसानले उत्पादन गरेका वस्तु ढुवानीका लागि गाउँपालिकाले दुई सवारी साधनको व्यवस्था गरिएको र किसानको घरघरबाट ल्याएका वस्तु बजारमा ल्याएर उपभोक्तालाई उपलब्ध गराउने गरेको गाउँपालिकाले जनाएको छ । रासस
