पोखरा: सभामुख कृष्णबहादुर महराले पत्रकारले समाजको रुपान्तरणका लागि उत्प्रेरक (क्याटलिष्ट)को भूमिका निर्वाह गर्नुपर्ने बताएका छन्। नेपाल पत्रकार महासङ्घको केन्द्रीय साधारणसभा एवम् विधान अधिवेशनको बिहीबार पोखरामा उद्घाटन गर्दै उनले समाज परिवर्तनमा पत्रकारको महत्वपूर्ण भूमिका हुने बताए। समाज बदलिँदा आउने अप्ठेरामा सञ्चार क्षेत्रको आलोचनात्मक भूमिका अपरिहार्य हुनुपर्नेमा जोड दिँदै उनले विगतमा निरङ्कुशता विरुद्धमा लड्नुपर्ने अवस्था थियो भने अबको समय अराजकताविरुद्ध लड्नुपर्ने धारणा राखे।

गण्डकी प्रदेश सरकारले 'आन्तरिक पर्यटन वर्ष' घोषणा गरेकोप्रति स्वागत गर्दै सभामुख महराले गण्डकी प्रदेश पर्यटनको आकर्षक केन्द्र भएको उल्लेख गरे। आफू १० वर्षअघि सञ्चारमन्त्रीको नेतृत्व सम्हाल्दा सञ्चार क्षेत्रको विकासका सन्दर्भमा केही महत्वपूर्ण कामको थालनी गरेको स्मरण गर्दै उनले वर्तमान सरकार पनि यस क्षेत्रको विकासका लागि अघि बढेको धारणा राखे।

प्रेस स्वतन्त्रता हनन हुन नदिन सरकार प्रतिबद्ध : मन्त्री बाँस्कोटा

कार्यक्रममा सञ्चार तथा सूचना प्रविधिमन्त्री गोकुलप्रसाद बाँस्कोटाले प्रेस स्वतन्त्रताको हनन हुन नदिन सरकार प्रतिबद्ध रहेको बताए। उनले श्रमजीवी पत्रकारको हकहितका लागि सरकार सचेत रहेको प्रसङ्ग उल्लेख गर्दै न्यूनतम पारिश्रमिकमा २५ प्रतिशत वृद्धि गरिएको र यसको सुनिश्चितताका लागि बैंकिङ प्रणालीद्वारा व्यक्तिको नाममा भुक्तानीको व्यवस्था गरिएको स्पष्ट पारे।

समानुपातिक विज्ञापनका लागि सरकारले ‘विज्ञापनसम्बन्धी विधेयक’ संसद्‍मा पेस गरेको र सरकारले अब विज्ञापन बोर्डमार्फत विज्ञापन उपलब्ध गराउने मन्त्री बाँस्कोटाले जानकारी दिए। समानुपातिक माध्यमबाट विज्ञापन पाएपछि साना मिडिया बढी बलियो हुने उल्लेख गर्दै मन्त्री बाँस्कोटाले सरकार प्रेस स्वतन्त्रताको पक्षमा रहेकाले नै मुलुकी संहिता सम्बन्धमा प्रेससम्बन्धी सुझावका लागि कार्यदल गठन गरेको जिकिर गरे।

संस्कृति, पर्यटन तथा नागरिक उड्डयनमन्त्री रवीन्द्र अधिकारीले मुलुकको समृद्धिका लागि पत्रकारिता क्षेत्रको महत्वपूर्ण भूमिका रहेको बताए। मुख्यमन्त्री पृथ्वी सुब्बा गुरुङले केन्द्रीकृत मानसिकताका कारण सङ्घीयता कार्यान्वयनमा अप्ठेरो पर्दै आएको बताउँदै सङ्घीयताको सफल कार्यान्वयनमा सञ्चार क्षेत्रको महत्वपूर्ण भूमिका हुने दाबी गरे। नेपाल कम्युनिष्ट पार्टी (नेकपा)का पोलिटब्यूरो सदस्य योगेश भट्टराईले सरकारको विरुद्धमा भ्रम फैलाइएको उल्लेख गर्दै प्रेस जगतकाे स्वतन्त्रता रक्षाका लागि सरकार कटिबद्ध रहेको उल्लेख गरे।

नेपाली कांग्रेसका केन्द्रीय सदस्य कुमार खड्काले प्रेस स्वतन्त्रता, लोकतन्त्रको रक्षा आदिमा सञ्चार क्षेत्र चनाखो बन्नुपर्ने बताउँदै कांग्रेस प्रेस स्वतन्त्रताको हिमायती रहेको बताए। नेपाल पत्रकार महासङ्घका केन्द्रीय अध्यक्ष गोविन्द आचार्यको अध्यक्षतामा सम्पन्न भएको कार्यक्रममा राजपाका नेता लक्ष्मणराज कर्ण, सङ्घीय समाजवादी फोरमका उपमहासचिव प्रकाश अधिकारीका साथै नेपाल पत्रकार महासङ्घका पूर्वअध्यक्षहरू र विभिन्न सञ्चार क्षेत्र सम्बद्ध सङ्गठनका पदाधिकारीले सञ्चार क्षेत्रको समस्या लगायतका विषयमा प्रकाश पारेका थिए।

पाँच पुरस्कार प्रदान

महासङ्घद्वारा पत्रकारिता क्षेत्रसँग जोडिएका व्यक्तित्वका नाममा स्थापित पुरस्कारबाट पाँच जनालाई पुरस्कृत गरिएको थियो। नेपाल पत्रकार महासङ्घका संस्थापक एवम् पूर्वप्रधानमन्त्री कृष्णप्रसाद भट्टराईको नाममा स्थापित 'कृष्णप्रसाद भट्टराई राष्ट्रिय पत्रकारिता पुरस्कार'बाट सप्तरीका शिवहरि भट्टराई सम्मानित भए। पुरस्कारको राशी एक लाख रुपैयाँ रहेको छ।

त्यस्तै, 'गोविन्द वियोगी राष्ट्रिय पत्रकारिता पुरस्कार'बाट दृष्टि साप्ताहिकका सम्पादक शम्भु श्रेष्ठलाई पुरस्कृत गरिएको छ। सो पुरस्कारको राशि ५० हजार रुपैयाँ र सम्मानपत्र छ। 'कृष्णसेन ‘इच्छुक’ राष्ट्रिय पत्रकारिता पुरस्कार'बाट काठमाडौंका बलराम थापा पुरस्कृत भए। सो पुरस्कारको राशी पनि ५० हजार रुपैयाँ रहेको छ। यस्तै 'उमासिँह स्मृति पत्रकारिता पुरस्कार'बाट सिरहाका हिरालाल चौधरी र 'गौरी कठायत स्मृति पत्रकारिता पुरस्कार'बाट अछामकी गीता कुँवरलाई पुरस्कृत गरिएको छ। दुबै पुरस्कारको राशी १५ हजार रुपैयाँ रहेको छ।