एजेन्सी : महामारी नियन्त्रणमा राम्रो काम गर्न नसकेको तथा चीनको पक्ष लिएको आरोपसहित विश्व स्वास्थ्य संगठन (डब्ल्युएचओ) सँग सबैखाले सम्बन्ध तोडेको अमेरिकाले डब्ल्युएचओबाट बाहिरिने औपचारिक प्रक्रिया शुरु गरेको छ ।
राष्ट्रपति डोनल्ड ट्रम्पले संयुक्त राष्ट्रसंघ र कंग्रेसलाई औपचारिक पत्र पठाउँदै डब्ल्युएचओबाट बाहिरिने औपचारिक प्रकिया सुरू गरेका हुन् ।
यो प्रक्रिया पूरा गर्न भने अब कम्तिमा १ बर्ष लाग्ने बीबीसीले जनाएको छ । कोरोना संक्रमणको महामारी शुरु भएसंगै डब्ल्युएचओ चीनको नियन्त्रणमा आएको आरोप लगाउदै गत मेमै ट्रम्पले डब्लुएचओ छोड्ने घोषणा गरेका थिए ।
युरोपेली युनियन ईयू लगायतले नछोड्न गरेको आग्रह अस्वीकार गर्दै ट्रम्पले राष्ट्रसंघीय नियोग छोडी त्यसलाई प्रदान गर्दै आएको सहयोग रकम अन्यत्रै खर्च गर्ने निर्णय गरेका थिए ।
अमेरिका डब्लुएचओको सबैभन्दा ठूलो दातृ मुलुक हो । उसले वार्षिक ४० करोड डलर रकम सहयोग गर्दै आएको छ ।
