हेटाैंडाः हेटौंडामा जारी दोस्रो सहिद स्मृति मकवानपुर गोल्डकप फुटबलको दोस्रो सेमिफाइनलमा आज पाहुना टोली क्यामरुनी दाउफिन्स र रुस्लान थ्री स्टार क्लबबीच प्रतिस्पर्धा हुँदैछ । हेटौंडास्थित वन विज्ञान अध्ययन संस्थाको मैदानमा अपरान्ह साढे ३ बजेपछि सेमिफाइनल प्रतिस्पर्धा सुरु हुनेछ । फाइनल प्रवेशको लक्ष्यमा रहेका दुबै टोली सहज जितसँगै उपाधि नजिक पुग्ने योजनामा रहेका छन् । आजको विजेताले उपाधिका लागि शनिबार आयोजक मकवानपुर–११ को सामना गर्नेछ ।
यसअघि हिजो भएको पहिलो सेमिफाइनलमा विभागीय नेपाल पुलिसलाई १–० गोल अन्तरले हराउँदै आयोजकले ऐतिहासिक उपलब्धी हात पारेको थियो । मकवानपुर गोल्डकपको उपाधि विजेताले ८ तथा उपविजेताले ४ लाख रुपैयाँ हात पार्नेछन् ।
