बेनी : हिमाली जिल्ला म्याग्दीको गलेश्वर बेनी सडक खण्डमा ध१ज ८९६ नम्बरको जीप दुर्घटना हुँदा एक जनाको मृत्यु भएको छ भने चालक सहित ११ जना घाइते भएका छन् । तीन जना गम्भीर घाइतेलाई उपचारका लागि पोखरा रिफर गरिएको छ ।
रघुगंगा गाउँपालिका–६ ठाडाखानीबाट सदरमुकाम बेनीतर्फ आउँदै गरेको जीप बेनी नगरपालिका–८ र ९ को सीमानामा दुर्घटना हुँदा अन्नपूर्ण गाउँपालिका–२ भूरुङ तातोपानीकी १० वर्षिय रिया बिकको मृत्यु भएको छ । विकको बेनी अस्पतालमा उपचारका क्रममा मृत्यु भएको बेनी अस्पतालका सूचना अधिकारी प्रकाश सुवेदीले बताए । त्यस्तै घाइतेहरु मध्ये रघुगंगा गाउँपालिका–६ का ३० वर्षिय चालक नन्दलाल छन्त्याल, ८ वर्षिय दिक्षा शेरपुजा र बेनी नगरपालिका–८ का ४२ वर्षिय दलप्रसाद गौचनलाई थप उपचारका लागि पोखरा रिफर गरिएको उनले बताए ।
अन्नपूर्ण गाउँपालिका–२ की ४२ टकमायाँ बिक, रघुगंगा गाउँपालिका–६ का ३० वर्षिय बसन्त छन्त्याल, ५० वर्षिया अप्सरा पाइजा, २० वर्षिय सिर्जना शेरपुञ्जा, ४० वर्षिय ठककुमारी शेरपुञ्जा, १४ वर्षिय दिवा शेरपुञ्जा, चालककी श्रीमती मायाँ छन्त्याल र ७ वर्षिय इच्छा शेरपुञ्जा घाइते भएको र उनीहरुको बेनी अस्पतालमा उपचार भइरहेको छ ।
गाडी सडक भन्दा तल कालिगण्डकी किनारमा पुगेको र दुर्घटनाको कारण बारेमा अनुसन्धान भइरहेको जिल्ला प्रहरी कार्यालय म्याग्दीका सूचना अधिकारी तथा प्रहरी निरीक्षक डाक्टर प्रसाद चौधरीले बताए । उनले भने –‘गाडीमा १२ जना सवार भएको देखियो दुर्घटनाको अन्य कारण खोजी भइरहेको छ ।’
